Conte-a'n Chelsea mualpho pui

An ram leh tun hma lama ro a rel tawhna hmun ni bawk Italy-ah Antonio Conte a kir a, Juventus manager hlui hi si thum faiin a zawr. Thawhlehni zan Champions League group match inkhelah Premier League champion Chelsea chu AS Roma lakah 3-0 in an tlawm.

Group C inkhel dangah Atletico Madrid chu an mi­khual Qarabag nen 1-1 in an inhnehtawk a, Conte naute hian point sarih an neih tawh avangin November 22-a Qarabag an luhchhuah thei a nih chuan last 16 an inhlangkai dawn tho a ni.

A goal nghal

Chelsea hian table hma­hruaitu ni chungin Rome khaw­pui an pan a, hnehna chang ni sela chuan knock out round an lut der dawn. Amaherawhchu, an beisei leh duh ang ngawtin khualmualah thil a kal vek bik lo.

Stadio Olimpico-a inkhelah Manchester City player hlui Aleksandar Kolarov leh Edin Dzeko ten ball an inpek hnuah Italy international forward Stephan El Shaarawy chuan yard 25-a hla aṭangin an goal khatna a khung a, goal hmasa ber a luh hian second 39 bak an la inkhel hman lo.

Chelsea player manto ber Alvaro Morata-a'n an siphurh sut theihna hun ṭha nei mah se Real Madrid striker hlui hian hnai tak aṭangin a hlah - Roma an vanneih bakah goal hmaah Morata a hriam tawk lo deuh.

Chawlhlawk hmain goal hmahruai khungtu El Shaarawy bawk a inlar leh, midfielder Radja Nainggolan-a long ball pet chu Roma defender hlui Antonio Rudiger-a'n a chingfel thei lo a, a hun ṭha neihah El Shaarawy a chesual ve duh lo; inkhel chawhnu lamah Diego Perotti chuan an goal thumna a khung bawk.

Roma hian an goal lina khung theihna hun pawh an nei, Blues defender ten season hmasa Serie A top scorer Dzeko an ven lutukna lamah Diego Perotti an hmuh hmaih, vengtu nei lo forward Perotti hian a pet over hlauh avangin Chelsea mualpho lutuk tur a ti nep deuha ngaih a ni.

Tlarhnung pawp

Chelsea manger Conte hian an ram Italy a enkawl laiin, "Goal khung ṭeuh a ngai lo, kan khingpuite aia kan khung tam chuan a tawk mai," tiin a sawi tawh. Italian manager hian season hmasa khan an goal khung hnem ai mahin an tlarhnung phui chu league no­mawi a chawi theih chhan a ni.

Tun season-ah erawh Blues hi an buai, tlarhnung puitu pawimawh N'Golo Kante chu hliam vangin thla khat chhung an chhawr thei lo. France international hian training zawm tawh mah se an la chhawr ngam lo. David Luiz chu midfield-ah khelhtir a ni a, kartawpa hahchawlhtir Gary Cahill chuan Davide Zappacosta thlakin Cesar Azpilicueta chu ding lamah awmtir a ni.

Chelsea hian goal an phurh hnuah na takin an nawr let thei a, Morata bakah Eden Hazard leh Marcos Alonso te chuan Roma tlarhnung an chhaih buai thei hle. Mahse, Blues hian an khingpui an nawr nat poh leh an beih letna an dawl zo lo - keeper Thibaut Courtois pawhin hna a ngah malh malh thei hle.

Conte lawm lo

Chelsea manger Antonio Conte chuan chak duh zawk Roma an chak thu leh kawng engkimah an tuihal tawk loa a hriat thu a sawi chhuak. Conte chuan, "Engkim kha a fuh lo vek, Chelsea kan nih chuan kan khingpui ten min hlau tur a ni. Mahse, tun ṭumah kha chuan hlauh turin kan awm lo a ni," tiin a sawi.

Italy leh Juventus manager hlui chuan sawi zawmin, "A bul kan ṭan fuh lo kha chu a la pawm thiam theih, inkhel chawhnu lamah kan khel chhe zual sauh kha chu sawifiah ngaihna pawh a awm lo. Seacond half kan khelh dan kha chuan min ti thinur tak zet," tiin a naute khelh danah a lawm lo hle.

Chelsea tlarhnung phui loin sawi a hlawh a, an tlarhma lam pawhin beisei an phak bik lo. Spain internationa striker Morata khan hun ṭha vawi hnih nei mah se a hmang ṭangkai thei lo a, khelmual chhungah minute 75 hun a hman chhung khan vawi 26 chiah ball a khawih a ni.