Barcelona leh Juventus an chelh
Thawhlehni zan Champions League Group D inkhelah beisei loh result a thleng a, an khingpui laka chungnung tura ngaih Barcelona leh Juventus ten hnehna an chang zo lo ve ve.
Barca hian khualmualah Olympiakos chu goal khung loin an inhnehtawkpui a, kum nga chhung Champions League group stage-a goal an khung loh hmasak ber a ni.
Sporting Lisbon-in an mikhual Juventus chu 1-1 in an lo chelh bawk. Barca-in last 16 inpetkai an beiseina chu match khat dang an nghah leh phawt a ngai tihna a ni a, Juve tan beisei a la bo lo bawk.
Suarez a nil
Season hmasaah Luis Suarez-a'n match 51 khelin goal 37 a khung a, tun season-ah erawh match 13 khelin goal thum bak a khung thei lo. Olympiakos khelmualah pawh Suarez a nil a, vawi sarih ngawt shot a nei chungin goal a khung lo. Barca tan heti zat shot nei chunga goal a khung loh hmasak ber a ni - vawi khat bar a pet per.
Suarez hian bar a pet per hnuah hmasial lo takin Lionel Messi tan hun ṭha siamsak mah se Barca kaltluan loh zan a ni a, goal an khung thei lo. Barca hian an match hnuhnung pahniha Juventus leh Sporting Lisbon an hmachhawn hunah point khat an hlawhchhuah chuan last 16 an lut ang.
Juve tan Higuain
Juventus-in Sporting Lisbon khelmualah goal khat bak an khung thei lo a, pathumna Sporting aiin point thumin la sang mah se an la hmachhawn leh tur hi Barcelona leh Olympiakos an nih avangin last 16 lut chiang tawha indah thei an ni lo.
Sporting khelmuala inkhelah hian Juventus-in si an phur reng zawk a, Portuguese club tan Bruno Cesar chuan minute 20-na lekah goal hmahruai a khung. Mahse, kar hmasa lawka Juve boss Massimiliano Allegri-a'n Europe-a hmasawn mamawh anga a sawi Gonzalo Higuain-a'n a pu beiseina a chhanglet a, hun tawp nan minute 11 chauh a awm tawh tihin an si phurh a sut. Goal dang erawh a lut tawh lo a, point khatah team pahnih an lungawi a ṭul.