Zaninah Arsenal an tling dawn?
Arsene Wenger-a naute tan Europa League knock out round lut turin match khat bak chak a ngai tawh lo. Zanin dar 1:35 hian Arsenal hian Emirates Stadium-ah Red Star Belgrade an mikhual dawn a, hnehna an chang a nih chuan an tlang chiang ang.
Arsenal hian Pathianni zanah Premier League hmahruaitu Manchester City an lenchilh leh nghal a ngai dawn a, league champion nih tum Wenger-a'n zaninah hian a player ṭha a khelhtir a rinawm loh - Europa League match hmasa lamah pawh league lama a player chhawr ṭhin te a khelhtir ngai meuh lo a ni.
Europa League Group H-ah Gunners hi BATE, Red Star Belgrade leh Cologne te nen an awmkhawm a, match khat
ṭheuh an inkhel kual tawh a, Arsenal hian hnehna an chang vek - zanin hian BATE hian Cologne lakah hnehna an chang zo lo a nih chuan North London club hian point khat chauh an hmuh belh a nih pawhin an tling tho ang.
A awlsam
Arsenal leh Serbian club Red Star Belgrade te hi October 19 khan an inkhel tawh a, striker Olivier Giroud-a goal khat hmangin khualmualah Gunners an chak - zaninah an khelmuala an khelh tawh dawn avangin Wenger-a naute hi chak tura rinkai an ni.
Serbia rama an inkhelh ṭum hian Wenger-a'n inhliam vangin keeper David Ospina a chhawr thei lo a, league lama a chhawr rim Petr Cech-a'n si ban a nghak. Colombia international Ospina hliam hi a la dam loh avangin Cech bawk a inlan leh a ngai dawn.
Defender Shkodran Mustafi a la awm loh avangin Mathieu Debuchy leh Rob Holding te mawhphurhna a sang ang. France international Giroud hian tlarhma luahlum turin a rintlak zia a lantir fo a, ani thlawp tur hian Theo Walcott leh Jack Wilshere an awm leh bawk ang.
An kal chhoh tawh dan thlir chuan Arsenal hi harsa lutuk loa tlang thei tur an ni. Amaherawhchu, inkhel a zawh hma chuan a la chiang bik lo. Team pahnihte hi kum 1978 UEFA Cup third round-ah khan an intawng tawh a, Highbury-ah goal khat ve ve khunga an inhnehtawk hnuah Sebian club hian an mualah si khat faia hnehna changin an tlang daih - season hmasa Serbian league pahnihna hi zuam sual theih tur an ni.
Sum hmang pahnih
Premier League club Everton leh Italian club hlun AC Milan ten nipui laiin sum an hmang hnem a, team pahnih hian an beisei ang result an la nei thei lo. Everton hian Ronald Koeman an ban hnuah manager nghet an la nei leh lo, zanin dar 11:30 hian Ligue 1 club Lyon an lenchilh dawn - an chak lo a nih chuan last 16 luh an beiseina a tawp ang. Everton hian match thum khelhah point khat chiah an la hmu a, zanina an khingpui tur Lyon hian point nga an nei tawh thung.
Everton manager lailawk David Unsworth chuan, "Chelsea leh Leicester City lakah match ṭha tak kan khel a, kan vanduai vang chauha chak lo kan ni. Minute 45 chhung ṭha taka khelh a tawk lo a, zaninah hian minute 90 chhung kan insawrbing a nih phawt chuan kan mamawh angin point thum kan hmuh theih ka beisei," tiin a sawi.
Serie A lamah Milan-in beisei phak lo mah se Europa League lamah erawh group hmahruaitu an ni thung. Zanina Milan hmachhawn tur hi an hnuai chiaha awm AEK Athens an nih avangin a chak zawk dinhmun a ṭha dawn.