Pavlyuchenkova lakah Kerber a chak lo

WTA Elite Trophy khelh mekah hmeichhe singles world number 1 hlui Angelique Kerber chu a match hmasa berah Anastasia Pavlyuchenkova lakah a chak lo nghal. German nula Kerber tan season kharna tournament bul ṭanna hi a duhawm lo hle.

Thawhlehni zan inkhelah kum 29 mi Kerber hi darkar khat leh minute 45 chhungin Russian nula lakah hian 6-3, 3-6, 6-2 in a chak lo. China-a neih he inelna hi league anga khelh kual a nih avangin Kerber hian semifinal beiseina a la nei a, chutihrualin a hna a hautak tawh ang.

Kerber hian season hmasa khan Australian leh US Open nomawi a chawi a, Serena Williams lak aṭangin world number 1 nihna pawh a chhuh sak hial. Mahse, kuminah erawh beisei a phak lo hle - tun dinhmunah world number 11 a ni phak hram; WTA Finals-ah pawh a inlan phak lo a ni.

Seeded pariatna Kerber chuan, "Ka tan chuan kum ṭha a ni lo, tun ṭumah pawh khan a tir aṭanga a tawp thleng khan chungnung zawk nih lai ka nei meuh lo," tiin a sawi. Inkhel dangah Coco Vandeweghe chuan China number 1 Peng Shuai chu darkar khat leh minute 55 chhungin 3-6, 6-3, 6-2 in a hneh ve bawk.