Sunderland boss an ban

Championship club Sunderland chuan an coach Simon Grayson chu match 18 chiah a kaihhruai hnuah an ban. Team 24 awmna Championship-a 22-na dinhmun luah mek Black Cats hian table mawngphaha awm Bolton Wanderers chu 3-3 in an inhnehtawkpui a, inkhel zawh aṭanga minute 18 hnuah Grayson banna hi tihchian nghal a ni.

Sunderland hi season hmasa khan Premier League aṭangin Championship-ah hian an tla thla a, boss David Moyes chuan Stadium of Light hi a chhuahsan nghal. Manchester United boss hlui hmun ruak luah tur hian Preston North End boss hlui hi lakluh a ni a, Black Cats fan-ten a chungah beiseina sang tak nei mah se league match 15 a khelhpuiah vawi khat chiah hnehna a chanpui thei.

Grayson chhuah rual hian a assistant manager Glynn Snodin pawhin a pu hnung hi zuiin a chhuak ve nghal a, Sunderland hian tun dinhmunah an club enkawl lailawk tur pawh an nei rih lo.

Sunderland chief executive Martin Bain chuan, "Simon leh a naute hian he hmuna an cham chhungin kan team tan theihtawp an chhuah a, chutihrualin Simon-a thawhrimna leh tawnhriat ngahnate chhawr kan inbeisei laiin kan beisei ang erawhin thil a kal lo. Kan beisei ang result kan neih theih loh avangin hma kan sawn theihna tura inthlak danglam mai hi a ṭulin kan hre ta a ni," tiin an boss an ban chhan a sawifiah.