Koeman dinhmun a ṭha

Ronald Koeman chu a awm bawr zai a nih hnuah damdawi in aṭangin a chhuak leh tawh. Netherlands manager hian tunah chuan a dinhmun a ṭhat tawh thu a sawi.

Kum 57 mi Koeman hi a awm bawrah na a neih avangin rang takin enkawl a ni a, zai a ngai hial. Everton manager hlui chuan, "A nihna takah chuan ka hlau, mahse doctor-ten a hun takah rang takin min ṭanpui hman.

"Mi hrang hrang hnen aṭangin dam leh thuai tura duhsakna thu ka dawng hnem, harsatna han tawh chiah hian miten min lo hmangaih zia hriatchhuah tharna a ni ve ṭhin bawk," tiin a sawi.

Player a nih laiin Koeman-a'n ram tan match 78 a khelh aṭangin goal 14 a khung, 2018 aṭang khan an ram team hi a enkawl ṭan. Netherlands hi an ropuina neih let pui a tum a, European Championship 2020 khel turin a hruai kai tawh.