Son-a'n sipai training a zo

Tottenham Hotspur forward Son Heung-min chuan an ram South Korea dan angin chawlhkar thum chhung sipai training a nei a, nimin khan a training hi a zo fel; a training rualpui 157 zinga ti ṭha ber a ni.

South Korea rama tlangval zawng zawngte chu kum hnih chhung vel sipaiah an ṭang ngei tur a ni. Mahse, Asian Games-a gold medal la leh, inelna lian Olympic infiamna eng emaw bera medal la phak chin chu ngaihhnathiam an ni thung.

Son-a hian 2018 Asian Games football tournament-ah khan an ram a champion pui a, hei vang hian a ṭan hun chhung tur pawh a tawi. Training zo tawh mah se, tun aṭanga thla 34 ral hmain darkar 544 chhung vantlang hna a thawh a la ngai.

March thla khan London aṭangin kum 27 mi Son hi an ramah a haw. Seoul khawpui a thlen hnuah ni 14 khunghran phawt a ni a, chumi hnuah sipai training hi a zawm leh.

South Korea international hian February 16-a Aston Villa nen an inkhelh ṭumin hliam a tuar, a hnu lamah a la inkhel leh lo. Premier League season khelh chhunzawm a nih chuan Spurs tan a inlan leh tawh ang.