Police kutah Dinthar hmalam hun

Mizoram Premier League champion hmasa ber Dinthar FC-in Mizoram league sang ber an khel zel dawn em tih chhân­na chu a hriat hnai ta. Vawiin tlai dar 3:00 hian Mai­mawms-in Lammualah Mizoram Police an hmachhawn dawn a, tual­chhung football ngaina tan chuan hun danglam bik a ni.

Beiseina siamtu

Mizoram Police-in Dinthar FC beiseina siam turin an match hnuhnung berah Chanmari West FC an hneh sak a, Mai­mawms hian I League cham­pion Aizawl FC hneh lo mah se Lalbiaksanga Colney hoten West Warrior laka point thum an hmuh avangin Dinthar lamin MPL khelh beiseina an la nei ve zel.

Amaherawhchu, Police chak chhan hi Dinthar FC duh­sak vang a ni lo a, semifinal thlen an tum vang a ni. Season chawhma lama tla tura ngaih Police hian BS-a hnuaiah result ṭha an neih avangin knockout stage an thlen loh chuan an lawm tawh lo ang.

Phuba chu?
MPL hmasa berah Police chu team ṭha bera ngaih an ni a, amaherawhchu Police Meet khela an zin chhuah hnuah an chau a, Dinthar FC-in an lehthal. Mizoram football history-ah Dinthar FC-in hmun pawimawh an chang a, Police tan ser nung a awm reng thung.

MPL1 an champion loh avangin Police-in ngai an awh leh tawh lo a, MPL4-ah phei chuan table mawngphahah awmin an relegate. Hei vang hian Dinthar FC-in MPL

ṭan tirh aṭanga an elpui Police lakah zahngaihna an beisei a nih chuan an tisual ang. Chu­tih­rualin Maimawms hi an chak loh a, zan lam inkhela Chanmari West-in Aizawl FC laka point an hmuh si chuan Dinthar FC hi an relegate dawn tihna a ni. Club huaisen tiha hriat ṭhin Dinthar FC-in MPL zel khelh zel an duh a nih chuan vawiin hian Police lakah an zia an chhuah a ṭul dawn.

Chak a ngai
Mizoram Police coach Lalbiaksanga chuan, "Chak tumin kan khelh a ṭul a, draw pawh a thiang lo. Kan player-te an dam kim a, kan ṭhat theih dan berin kan inlan thei ang. Phase 1-a Dinthar FC kan hneh loh ṭum kha ka en let a, kan hneh theih ngei ka ring a ni," tiin chak an mamawh thu Vanglaini a hrilh.

Maimawms-in Phase 1-ah Mizoram Police 3-2 in an hneh a, hemi ṭuma Dinthar FC tana goal khungtu Lalbiakhlua chuan Police a zawm tawh.