Federer hmachhawn tur Alexender Zverev
Association of Tennis Professionals (ATP) hnuaia singles tournament hnuhnung ber chu November 12-19 chhung hian O2 Arena, London-ah khelh a ni dawn a, vawi ruk champion tawh Roger Federer chuan a group match-ah Alexander Zverev a hmachhawn a ngai dawn.
Nilaini khan draw neih a ni a, player ṭha pariatte inel turte chu group pahnih Pete Sampras Group leh Boris Becker Group-ah ṭhen hran niin group match-ah player palite an inkhel kual vek ang a, a tawpah a sang pahnih zelin semifinal an lut ang.
World number 1 ni chunga season khar tur Rafael Nadal chu Boris Becker Group-ah awmin David Goffin (Belgian), a vawi khat nana inlan tur Grigor Dimitrov (Bulgaria) leh player beiseiawm Dominic Thiem (Austrian) te nen awn awm khawm. Nadal hian a match hmasa berah David Goffin a hmachhawn ang.
Pete Sampras Group lamah Federer chu kumin Wimbledon final-a a hneh tak Marin Cilic, Paris Masters champion hlim American star Jack Sock bakah rawlthar beiseiawm ber tih ngam Zverev te nen an awmho ve thung a ni. Match hmasa bera Federer-a'n a tum tur chu Sock a ni.
Kum 20 mi Zverev hian tun season chhungin nomawi panga a chawi tawh a, heng zianga pahnih chu Grand Slam dawt chiaha inelna lian 1,000 Masters title niin tun dinhmunah hian world number 3 a ni.
German star Zverev chuan, "Kumin hi ATP Finals ka vawi khat khelhna tur a ni a, a tawpna tur a nih loh ka beisei. Ka theihtawpa ṭhain inbuatsaihna ka nei a, ka match zawng zawngah hnehna chan tumin ka bei ang, ka tan chuan he tournament khelh phak hi chawimawina a tling," tiin a sawi.
Tun ṭumah hian champion lai Andy Murray chu hliam vangin a inlan dawn lo a, vawi li champion tawh Novak Djokovic bakah Grand Slam vawi thum champion tawh Stan Wawrinka pawh tun season chhung chuan a inkhel kan hmu tawh dawn lo a ni.
Kumin ATP Finals hi a vawi 48-na tur chiah a ni a, he tournament bak hi chu tun season chhungin ATP hnuaiah mimal inelna a awm tawh dawn lo; ram leh ram mipa team hmanga inelna Davis Cup erawh November 20 hian khelh a ni thung ang.