Aizawl FC inthlahdul dawn lo
Zanin dar 7:30 hian Aizawl FC-in tlak hlauhawma awm Chanmari West an hmachhawn dawn a, I League champion hian Mizoram Premier League Season 6 semifinal thleng tawh mah se coach Paulo Meneses chuan an inthlah dul loh tur thu Vanglaini a hrilh.
Portuguese coach Meneses hian Phase 1-ah West Warrior a ring sual a, an inkhelh dawna player a siksawi nasat avangin Chanmari West hi Lalremruata goal hmangin 1-0 in an chak. AFC coach Meneses chuan, "Keini chuan phuba lam kan ngaihtuah lo a, kan duh chu point thum a ni a, player-ten an tihtur ṭheuh an titur a ni bawk," tiin inkhelh tawhna nena sawi zawm a duh lo.
Aizawl FC hian tun season-a an ṭhat vanglai an hmang chho mek a, MPL match hnuhnung paliah hnehna chang vekin goal 14 an khung a, goal hnih chiah an chhuah. I League champion hian Dinthar FC an hneh hnuah ISL club Chennaiyin FC hmachhawn turin Chennaiah an zin a, khual-mualah 0-1 in chak lo mah se an khelh ṭhat avangin an phurna a la reh lo.
AFC boss Meneses chuan, "Player-te an dam kim a, kan zinna ṭang pawhin ngai kan awh tawh a, chhuanlam tur kan nei lo," tiin MPL khel turin a inpeih leh tawh hle.
Hetihlai hian Chanmari West hi dah hniam theih an ni lo a, H. Lalnunzira hote hian Mizoram Police hneh lo mah se khelmuala an khelh danah team tum châkawm an ni tawh lo. West Warrior-in chhiarkawp danah semifinal la khel thei mah se MPL khel zel tura him phawt an dah pawimawh ang a, I League champion lakah point hlawhchhuah hrim hrim an tum ang.
MPL6 Khelh Hmabak
Vawiin Inkhel Tur
3:00 PM Mizoram Police Vs Dinthar FC
7:30 PM Aizawl FC Vs Chanmari West
Team Dinhmun
# Team Pld W D L GF GA GD Pts
1 Chhinga Veng 12 8 3 1 26 14 12 27
2 Aizawl FC 12 6 4 2 29 12 17 22
3 Chanmari FC 13 5 4 4 19 14 5 19
4 Mizoram Police 12 5 2 5 26 33 -7 17
5 Ramhlun North 13 4 4 5 22 22 0 16
6 Bethlehem VT 12 4 3 5 15 22 -7 15
7 Chanmari West 12 3 2 7 13 21 -8 11
8 Dinthar FC 12 2 2 8 14 26 -12 8