Saina leh Prannoy tan national gold medal

Saina Nehwal leh HS Prannoy te chuan 82nd Senior National Badminton Championship-ah singles nomawi an chawi. World number 1 hlui Saina hian PV Sindhu a hneh a, mipa champion tura rin kai ber Kidambi Srikanth chu Paran­noy-a'n a hneh ve thung a ni.

Nilaini zan khan Divisional Sports Complex, Nagpur-ah singles final khelh niin London Olympic bronze medalist Saina hian minute 54 chhungin Olympic leh World Championship silver medalist ni bawk Sindhu chu 21-17, 27-25 in a hneh.

Kum 27 mi Saina chuan, "Final match ka khelh dan chu ka beisei aia ṭha zawk a ni, Sindhu-i'n harsa tak taka a rawn vuak pawh ka la thei zel," tiin nomawi chawi tura a khelh ṭhat tawk thu a sawi.

Seeded pahnihna Saina hi tun hnaiah a tlahniam a, ranking-ah pawh 11-na niin Sindhu hi pahnihna a ni thung. Saina hian Senior National Badminton Championship-ah hian sulhnu a nei ṭha hle, vawi thum inlan tawhin inelna a hmachhawn hoah hian a champion vek.

Mipa singles final-ah seeded pahnihna HS Prannoy chuan tun season chhunga Seper Series title pali la thei Kidambi Srikanth chu 21-15, 16-21, 21-7 in a hneh. Parannoy hi ranking chhuak thar berah 11-na niin a tawn san ber ṭum a ni a, world number 2 Srikanth hneh tur hian minute 49 hun a hmang.

Srikanth leh Prannoy te hi international level-ah vawi nga an intawnna chiah a ni a, tun hnai an inkhelh hnuhnung pathumah Srikanth-a'n hnehna a chang, kum 2011 Tata Open-ah khan Prannoy hian a hneh ve tawh thung - a vawi hnih nan a chak a, Senior National Badminton Championship nomawi a vawi khat dawnna chiah a ni.

Kum 25 mi Prannoy chuan, "Ka tan chuan a hlu zual bik hle. Ka duh leh beisei chu a hunah tak a rawn thleng ta a ni, inelna hi ka hmachhawn fo tawh a, tun inelna bikah Srikanth hneh hi a ropui ka ti takzet. Tun hi ka tawpna ni loin ka khelh ṭhat inṭanna a nih ka beisei," tiin a sawi.