Sweden vs Italy Tu zawkin nge World Cup khel dawn?
World Cup Russia 2018 khel tura inelna a la zo lo a, ram langsar tam tak tan hmun a la chiang lo - Russia a an zin dawn leh dawn loh la chiang lo zingah Sweden leh Italy an awm a, ram pahnih hi World Cup khel lo tur atan chuan uiawm tling ve ve an ni.
Football ngainatute tana hriat nuam lo chu ram pahnih zinga pakhat zawk hian World Cup an khel dawn lo - zanin dar 1:15-ah World Cup playoff-ah an inhmachhawn dawn a, November 13-ah match hnihna an khel leh bawk ang. Inkhel pahnih belhkhawma chak zawkin World Cup an khel dawn a, zanin inkhel a hmuhnawm dawn.
Playoff zinkawng
Sweden hi Group A-ah awmin World Cup Qualifier an ṭan a, France leh Netherlands awmna group-ah hian France chiah tluk loin pahnihna an ni a, Russia-a an hmun neih tichiang turin playoff an khelh a ngaih phah. Sweden hian match 10 an khelhah vawi ruk hnehna an chang a, vawi khat draw result an nei - Netherlands nen an point hmuh zat in ang mah se goal diffe-
rence-a ṭha zawk an nihna an vanneihpui.
Italy-in qualifier-ah point 23 ngawt hlawh chhuak mah se Group G-a an awmpui Spain an nih miau avangin World Cup inpetkai nghal turin an point hmuh a tling tawk lo a, playoff paltlang leh phawt a ngaih phah - Italy hian match 10 an khelhah vawi sarih hnehna changin vawi khat chiah an tlawm a, zanina Sweden laka an inkhel turah pawh rinhlawh zawk an ni.
Team dinhmun
Sweden tan defender pawimawh Mikael Lustig chu hrem vangin a inlan thei dawn lo a, Toulouse winger Jimmy Durmaz hliam chungchangah Sweden coach Janne Andersson-a'n thuthar a la nei thei lo bawk. Italy coach Gian Piero Ventura-a'n player chungchangah buaina a nei lo a, league match 11 a khelha goal 14 khungtu Lazio striker Ciro Immobile chet ṭhat leh ṭhat lohah an innghat thui hle ang.
Italy ṭantute tana thu hriat nuam tur chu Sweden nena an inhmachhawn hnuhnung parukah an tlawm miah lo - vawi nga an chak a, vawi khat an inhnehtawk. Chutihrualin zanina an inkhelhna tur hmun hi Sweden a ni a, an mualah Sweden zuam ngawt chi an ni lo - Italy an mikhual vawi riatah vawi khat chiah an tlawm. Vawi li an chak a, vawi khat an inhnehtawk.
Italy chu Italy
Azzurri (Italy sawina) coach Ventura chuan, "Sweden squad hi an danglamna a tam lo a, tun hma ang thoin ṭha takin an khel reng. Tharum an ngah a, team thawhhona a ṭha bawk. Chu chu an thisena bet tel tlat a ni berin ka hria. Mahse, kan buaina ber tur chu Sweden team hi eng ang chiah nge an nih, tih lam a ni lo a, Italy hi Italy khelh dana kan khelh hi a pawimawh zawk chu a ni. Match pawimawhah Italy an talbuai ve ngai lo," tiin Italy team an nihna ang taka khel chhuak turin a naute a fuih.
Kum 1958-a an inpetkai zawh loh hnuah Italy-in World Cup an la khel ziah a, Ventura chuan, "Tumah hi World Cup khel lo tur angin an indah lo," a ti a, an ram mipui beiseina a san thu a sawi. Italy hian vawi li ngawt World Cup nomawi an chawi tawh a, major tournament an khelh loh langsar chu 1984 leh 1992 European Championship chiah kha a ni.
Sweden ringtu Zlatan
Euro 2016 hnuah Sweden captain Zlatan Ibrahimovic-a'n ram tana inkhelh a chawlhsan a, Sweden tan match 116 a khelha goal 62 khungtu striker hian a awm loh hnuah Sweden laka beiseina a tlem sawt thu a sawi. Zlatan chuan, "Sweden tana ka khelh lai kha chuan keimah vangin mipuiin beiseina an nei sang a, ka awm loh hnuah chuan an beiseina pawh a tla hniam tawh. Mahse, hei hian pressure a pe lo sawt a ni," a ti.
Manchester United striker hlui chuan, "Ka awm loh hnua pressure a hniam thu sawi hian kan naute hi an khelh ṭhat sawt phah a, anmahni dip daltu boruak sang awm miah loin hahdam takin an khelh theih phah a ni. Tawnhriat an ngah lo a ni mai thei a, mah se anmahniah hian tumruhna awm a ni," tiin Italy laka hnehna chang turin an ram team a beisei.