Keeper tihsual Chanmari vanneihna

Ramhlun North keeper Liansang­puia'n injury time-ah goal a chhuah a, Chanmari FC an draw phah avangin Samson Ramengmawia hoten Mizoram Premier League Season 6 semifinal khelh theihna hun ṭha an bawhpelh.

Nimin tlai Lammual inkhelah Chanmari FC-in Ramhlun North 2-2 in an draw hram a, H. Vanlalthlanga hote erawhin hahdam takin semifinal kawng an zawh thei tawh ang.

A goal lo

Ramhlun North-in first half an thunun zawk a, ball chang tamin goal chance ngah mah se Chanmari FC nen goal an khung thei lo.

Ramhlun North forward Lallian­sanga'n (Notea) a kawppui Rosangliana tan chance ṭha bik a siam a, RSa'n a goal zawnah a pet lo.

Notea'n Chanmari offside trap bumin keeper F. Lalmuanawma chauh a hmachhawn a, Durtlang tlangval hian amah thlawptu RSa pe loin goal-a pet a thlang a, Muanawma'n a dan sak.

A goal ta

Chanmari FC-in second half an ṭan ṭha hret a, amaherawhchu an tlarhnung phui loh vangin minute 54-naah goal an chhuah.

Ramhlun North captain C. Ramdin­mawia cross chu Chhuantea'n tauhin keeper Muanawma'n a dang. Hemi per hi Notea leh RSa ten pet nawn lehin Chanmari keeper-in dang ve ve mah se Chhuantea pet erawh a dang thei ta lo.

Ghanaian midfielder John Ampong-a'n box pawnah hmun awl a insiam a, minute thum hnuah Ramhlun North goal hnihna leh MPL-a a goal hmasa ber a khung.

Chanmariin minute 59-naah Vanlal­biaa Chhangte hmangin goal khat an chhang let.

Inkhel a hmuhnawm sawt a, chak lo tura lang tawh Chanmari hi injury time-ah Chanmari vannei zuiin substitute Rochhingpuia ball pet naran tak chu Ramhlun North keeper Liansangpuia'n ho angreng takin a kap karah a chhuah a, 2-2 in inkhel a tawp.

Semifinal?

Chanmari FC-in point khat hlu tak an hlawhchhuah avangin point 19 hmuin semifinal lut turin an dinhmun a ṭha ta hle.

H. Vanlalthlanga hote hian November 16-a an match hnuhnung berah Dinthar FC an hmachhawn dawn.

Ramhlun North-in Chanmari FC head to head-ah an pha lo a, semifinal lut turin inkhel dang result an ngaihchan a ṭul tawh. October 17 hian Samson-a naute hian Aizawl FC an hmachhawn dawn a, hmabak a ko ta hle.