Hri lakah Barca player an fihlim

Goal.com in a tarlan dan chuan Barcelona player-te chu Covid-19 lakah an fihlim a, winger Ousmane Dembele erawh endik a la ni ve lo. France international hi May 11, Thawhṭanniah endik ve a ni ang.

Spanish La Liga hi Covid-19 vangin March thla laihawl aṭang khan chawlh lailawk a ni a, tun karah training turin kir leh tawh hlawm mah se engtik hunah nge league an khelh chhunzawm dawn tih erawh hriat a la ni lo.

Nimin aṭang khan Ciutat Esportiva Joan Gamper-ah Barca hian training an nei ṭan a, team pumpui a huhoa awm loin mimal training neihtir an ni. Spain-ah hian hri leng vangin mi 25,000 chuang an thi tawh a, kai thar an la awm zel avangin club pawh a fimkhur hle.

Coach Quique Setien-a enkawl Catalan club hian league an chawlh lailawk hma khan table-ah hma an hruai mek. An elpui Real Madrid aiin point hniha an san zawk avangin league nomawi chawi beiseina an nei sang.