Kum 21 mi lek ang mai ka ni - Vardy
England striker Jamie Vardy chuan kum 21 mi ang leka naupang ang maia a inngaih thu a sawi. Vardy chuan, "Kum 21 mi ang mai niin ka inngai ṭhin. Ka kum zat ka ngaihtuah lutuk chuan upa lutukah ka inngai ang a, keimahah a lang chhuak ang tih a hlauhawm a ni," tiin a kum zat sawi tam a duh loh thu a sawi.
January-a kum 31 ni mai tawh tur Vardy hian England tana a match hmasa ber a khelh hmain kum 28 a ni tawh a, ram tan match 17 bak a la inlan lo. Kum 30 mi Vardy kum ang zat a nihin Alan Shearer kha chuan ram tana inkhelh a chawlhsan a, ram tan match 63 khelin Euro 96-ah top scorer a ni.
Mahse, Leicester City striker erawhin international chawlhsan hnaih mai a la tum lo. Vardy chuan, "Dik taka sawi chuan naktuk bak piahlam hi ka ngaihtuahnaah ka seng duh lo. Nakin hun atan ka ngaihtuahna ka sen lutuk chuan ka buai palh ang," a ti.
Vardy hian tun season-ah hliam vangin match a khel tam lo a, match 10 chiah la khelin goal ruk a khung tawh thung. Vardy chuan, "Ka hliam enkawl lai khan inah hahdam taka awm ka duh ṭhin a, mah se fa ka neih tawh avangin naupang ninhlei ringawt pawh kha buaipui tham a ni," tiin a tum anga a dam chak loh chhan a sawi.
England hian zanin dar 1:30-ah friendly match an khel dawn a, Wembley Stadium-ah Germany an mikhual ang.
Zanin Inkhel Tur - International friendly
Korea Republic 04:30 PM Colombia
China PR 05:05 PM Serbia
Japan 05:30 PM Brazil
Georgia 06:30 PM Cyprus
Ukraine 11:30 PM Slovakia
Belgium 01:15 AM Mexico
Poland 01:15 AM Uruguay
France 01:30 AM Wales
England 01:30 AM Germany
Portugal 02:15 AM Saudi Arabia