Messi-a'n Spain hmachhawn loh a duh
Argentina captain Lionel Messi chuan nakkuma FIFA World Cup khelh a nih hunah Spain nen first round-a inhmachawn loh a duh thu a sawi chhuak. Barcelona star hian Brazil, Germany, France leh Spain te chu champion thei zinga mi an nih thu a sawi bawk.
World champion vawi hnih ni tawh Argentina hian Russia panna ticket nei turin qualifier-a an match hnuhnung berah hnehna chan an mamawh a, inkhel pawimawh leh boruak sang takah Messi-a hattrick hmanga Ecuador hnehin an tum ram an thleng.
Jorge Sampaoli naute hi World Cup hnuhnung ber khan pahnihna an ni a, world champion Germany an hneh lohna kha goal khat lek a ni; nakkumah pawh rinkai an ni phak leh ngei dawn a, chutih rualin Europe ram lian ṭhenkhat hneh tur chuan qualifier lama an khelh aia ṭhain an khelh a ngai ngei ang.
Spain lo deuh
Argentina tana goal khung hnem ber Messi chuan, "Spain, Brazil, Germany leh France te hi champion thei tur khawpa ṭha an ni a, ka duhthusam ang chuan Spain nen hian group khatah awm lo ila ka duh. Player ṭha an ngah a, an theihna a sangin chetsual theihna tur an ni," tiin La Liga lama a hmachhawn
ṭhin player zingah ṭha tak tak an awm thu a sawi.
Messi hian World Cup nomawi chawi a duh a, Russia-ah hlawhtlinna an chang a nih chuan an khua Rosario aṭanga San Nicolas thleng chu kea kal a tum tih a sawi; Rosario leh San Nicolas inkar hi 65km zeta thui a ni.
Ram tan major tournament final vawi li khel tawha nomawi la chawi lo Messi chuan, "World Cup-ah kan champion a nih chuan Rosario aṭanga San Nicolas inkar chu kein ka kal ang tih ka intiam. Qualifier-a hun harsa kan tawh lai khan hnehna kan chan ngei ngei a ngaih thu ka sawi a, kan duh angin thil a thleng, tuna kan hna pawimawh hmasa chu inelna lian hmachhawn tura theihtawpa ṭhaa inbuatsaih a ni," tiin a sawi.
Messi a lal
Sevilla manager hlui Jorge Sampaoli-a'n an ram team a enkawl hnuah Lionel Messi chu khelmual chhunga an hotupa a nih chhunzawm a, player khel tur thlan chungchangah pawh Messi hian thu a nei hle nia sawi a ni.
Juventus hmatawng Gonzalo Higuain-a'n khel ṭha viau mah se koh a ni ngai lo a, Mauro Icardi tan pawh hmun a awm chuang lo. Inter Milan captain Icardi hian Messi ṭhianpa Maxi Lopez-a nupui hlui Wanda Nara-i chu nupuiah a nei zui ve a ni.
Manchester City striker hriam ber Sergio Aguero chu koh ni mah se bench-ah ṭhuttir ṭhin a ni a, Juventus tan tun season chhunga Seria A match 12 a khelh aṭanga goal 11 khung thei Paulo Dybala pawh koh ni mah se coach berin Messi nena khelh duntir a fuh loh thu a sawi a, Dybala tan inkhel bulṭan beiseina chi a ni bik lo.
Amaherawhchu, Messi chuan inkhel tur thlan chungchangah inrawlhna a neih loh thu sawiin, "Kan ram team hi ka duhdan anga kal tur a ni lo a, player khel tur thlan hi chu coach hna niin ka inrawlhna tur a awm lo. Icardi hi Argentina tana khelh pui ka duh lo niin an sawi ṭhin a, hei hi thu dik lo hulhual a ni," tiin a sawi.
Argentina manager Sampaoli hian player thlan chungchangah Messi hi a rawn lo chu a ni thei, chutih rualin Barcelona forward hian a theihna sang tak a lanchhuahtir theih nan kawng a siamsak ngei ni chuan a lang. Tlarhma lamah Messi hming langsar ti buai thei tur player a dahlut ngai rih lo a, tuna a kaldan ang hi chuan Messi hi World Cup chawipui tham a tling niin a ngai tih a chiang.
World Cup inbuatsaih nan Argentina hian inelna thlengtu tur Russia chu Inrinni zanah friendly match an khelhpui dawn a, November 14 zanah Nigeria an hmachhawn zui leh bawk ang.