Fiorentina player pathumin hri an kai

Italian Serie A club Fiorentina player pathum leh club tana hna thawktu midang pathum ten coronavirus an kai tih hmuh chhuah a ni a, an vai hian khung hran nghal an ni - player leh hna thawktu dang pawh endik zui nghal an ni ang.

Serie A club-te hi hun rei tak an chawlh hnuah training phalsak an ni leh tawh. Mahse an duh ang chuan thil a kaltluang rih dawn lo a nih hmel. Torino player, a hming tarlan loh pawhin hri a kai a, khung hran a ni ve bawk.

Fiorentina chuan thuchhuah siamin, "Thuneitu ten dan leh hrai zawm tur an tih ang thlapin thil tih a ni a, an dinhmun ngaihtuahawm ni lo mah se khung hran an ni. Midang pawh endik an ni ang," an ti.

Italy hi hri len nasatna hmun a ni a, club-ten training zawm leh tawh mah se engtik hunah nge football an khelh chhunzawm leh theih ang tih erawh tih chian a la ni lo.