I League champion Aizawl FC-in semifinal lut ; MPL champion hmasa ber Dinthar hmalam a thim

Aizawl FC-in Mizoram Pre­mier League Season 6 semi­final lut turin Nilai zan khan Dinthar FC 4-0 in an sawp.

I League champion tan hian David Lal­rinmuana, H. Lalmuankima, Masih Sainghani leh William Lalnunfela ten goal khat ṭheuh an khung.

MPL6-ah AFC hian point 22 an hmu a, panganaa awm Ramhlun North-in match hnih khelh hma hmabak an la neihah Paulo Meneses hote an umphak theih tawh loh avangin semifinal an lut.

Hetihlai hian Dinthar FC erawh match li chhung an chak loh zawn tawh avangin point riat hmuin table mawngphahah an awm chhunzawm zel.

AFC an thiam
Aizawl FC-in nung takin in­khel bul an ṭan a, minute 9-na lekah MK-a freekick hlawh­ chhuah chu captain David Lalrin­muana'n kawh zetin a pet goal nghal.

I League club an chungnung chhunzawm a, minute 21-naah Andrei Ionescu thawhrah sengin MK-a'n goal hnihna a khung. Mi­nute nga hnuah captain David-a corner pet chu Afghan de­fen­der Masih-a'n a lenna hmang ṭangkaiin a tauh lut leh bawk.

Paulo Meneses hoten Din­thar tan thawhchhuahna hun an pe lo a, darkar chanve chhung lekin chak zawk tur a hriat tawh.

Hun tawp thlengin I League club an chungnung a, second half-ah William Lalnunfela hmangin goal khat dang an khung belh. An goal hnuhnung ber hi man of the match-a thlan MK-a siamsak a ni.

I League club hian khelh zat inangah Chhinga Veng point ngain pha lo mah se Aizawl FC hian Dinthar FC an hneh hma hian Chhingcows hi an hneh.

Hei chauh hi ni loin AFC hian MPL6-ah goal 29 khung tawhin goal khung tam ber an ni a, goal venhim kawngah pawh goal 12 chhuahin Chanmari FC nen record nei ṭha ber an ni.

Dinthar ve thung
MPL champion hmasa ber Dinthar FC-in point an hmuh belh loh chuan season tharah an inlan tawh dawn lo. Coach thar Vanlalrova hnuaiah Maimawms hian Chanmari West FC an hneh nghal a, semifinal hial thlir hman mah se tunah chuan MPL khelh zel dan chauh an ngaihtuah tawh.

Maimawms hian Mizoram Police leh Chanmari FC te an la hmachhawn dawn a, MPL khel zel turin a chhe berah vawi khat tal chak a ṭul.

Rova hote vanneihna chu Ṭhuamluaia Muala West Warrior an hneh kha a ni a, head to head-ah an ṭhat zawk avangin point inangah dah san zawk tur an ni.

Dinthar tan semifinal khelh tum Police laka point thum hmuh hi a awlsam dawn lo a, Chanmari FC lahin an elpui club hi an 'Bye Bye' hreh dawn lo!

Point thum hmu ta reng pawh ni se Maimawms beiseina nung tur chuan Chanmari West-in an khelh hma baka Aizawl FC leh Bethlehem Vengthlang FC-te an hmachhawn hunah point an hmuh loh a ngai ang.