Alberto tan medal pahnih
ITTF World Junior Circuit India Junior and Cadet Open (Premium) chu November 1 khan Gautam Buddha University Hall, Greater Noida-ah khelh zawh a ni a, Mizo naupang beiseiawm Alberto Lalremruata chuan Cadet Boys singles-ah silver a dawng a, team inelna huangah bronze medal an hlawh chhuak bawk.
Tun ṭum inelnaah hian Indian player 56 an inlan a, group hran hranah ṭhenhran niin Alberto leh Jeho Hlimnakulhpuingheta te chu India aiawha inlan ni mah se group hranah dah an ni.
Cadet Boys semifinal-ah Mizo naupang pahnih hi an inhmachhawn a, Alberto hian Petroleum Sports Promotion Board Academy-a a zir pui Jeho-a lakah 12-10, 11-13, 11-8, 11-7 a hnehna changin final a lut - nomawi inchuhna inkhelah erawh Singapore naupang Yew En Koen Pang lakah Alberto hi 8-11, 11-3, 11-4, 11-6 in a vanduai zawkah a ṭang thung.
Alberto hi Mizo TT player beiseiawm berte zinga mi a ni a, nikum May thla khan Mizoram number 1 Isaac C. Lalsawmliana hnehin Lalrema Ngente Memorial Mizoram Ranking Table Tennis Championship mipa singles nomawi a lo chawi tawh bawk a ni.