A chung bera awm tluan tur Nadal

Rafael Nadal chu player dang tan umphak theih a ni tawh lo. Grand Slam vawi 16 champion tawh Nadal hian a vawi li nan world number 1 ni chungin season a khar dawn tih a chiang ta.

Nilaini zan khan Nadal hian Paris Masters-a a match hmasa ber a khel a, seeded pawh chang phak lo Chung Hyeon lakah Nadal hian minute 48 chhung lekin 7-5, 6-3 in hnehna a chang - Paris lama inlan ve lo Roger Federer tan a elpui hi ranking lamah umphak theih a ni tawh dawn lo a ni.

Kum 31 mi Nadal chuan, "Hun harsa ka paltlang a, hliam vanga tournament tam tak ka khelh theih loh hnuah hetiang dinhmun ka luah leh thei hi awih a har zawk hial," a ti. Nadal hian kum 2008, 2010 leh 2013 te khan world number 1 ni chungin season a khar tawh bawk.

Nadal hi world number 1 Federer aiin ranking point 1,460-in a sang zawk a, Paris Master-ah Federer a inlan lo bawk. Swiss star Federer hian ATP Finals nomawi chawi pawh nise Nadal a umphak thei tawh dawn lo.

Inkhel dangah seeded palina Alexander Zverev chuan a match hmasa berah Dutch star Robin Haase chu 3-6, 6-2, 6-2 in an hneh a, ATP World Tour Finals khelh beisei zinga tel phak Lucas Pouille leh John Isner te pawhin hnehna an chang ve bawk.

Pouille hian kar hmasa khan Vienna-ah nomawi a chawi a, Paris-ah pawh bul a ṭan fuh hle - Feliciano Lopez lakah 6-3, 6-4 in hnehna a chang.

Service nei ṭha Isner chuan 7-6 (2), 6-7 (11), 6-3 in Diego Schwartzman a hneh. US Open final-a Nadal hneh lotu Kevin Anderson erawh Fernando Verdasco lakah 5-7, 6-4, 7-5 in a chak lo nghal thung.