City tana goal khung hnem ber Aguero

Sergio Aguero chu Man­chester City tana goal khung hnem ber a ni ta. Argentine striker hian Napoli lakah goal khat khungin 4-2 in hnehna a chanpui a, English club City tana a goal khung zat belhkhawm chu 178 chiah a ni.

Nilaini zan khan Pep Guar­diola nauten Serie A hmahruaitu Napoli an luhchhuah a, defender pahnih Nicolas Otamendi leh John Stones bakah Aguero leh Raheem Sterling ten goal an khung - City hian hneh loh nei loin point 12 an hmu a, Champions League knock out round an inhlangkai.

Group F inkhel dangah Shakh­tar Donetsk chuan Feyenoord 3-1 a hnehin point kua an hmu ta a, Serie A lama hneh loh nei loa kaltluang lai Napoli chu point rukin an tlansan. Maurizio Sarri naute tan point hloh a thiang tawh lo ang.

Record chu

Atletico Madrid tana goal 101 a khung hnuah Aguero hian kum 2011 khan La Liga club chhuahsanin Manchester City a zawm. Argentina international hian Etihad Stadium-ah season sarihna a hmang mek a, inelna hrang hrangah match 264 a khelh aṭangin goal 178 a khung ta chiah a ni; goal 177 khungtu Eric Brook nena record inṭawm an neih chu a khum chiah.

Kum 29 mi Aguero hian record siam tur hian Leroy Sane ball tih per chu chang fuhin chak zetin an tlan luh pui a, box chhung a tlan thlen pui hnu lawkah Napoli keeper Pepe Reina dan hman lohin kawh zetin a hlap lut a ni.

Premier League hmahruaitu City manager Guardiola chuan, "He dinhmuna din hi a phu, club tana a hnathawh tawh hi a ropui em em a, midang pawhin kan lawmpuiin kan chhuang vek tur a ni - ani hi City tan legend a ni," tiin a sawi.

Wow

Champions League nomawi duh vangin Manchester City hian khawvela manager hlawh hnem ber ni turin Pep Guardiola an lalut a, Barcelona manager hlui hian a duh ang player a lakkhawm hnuah dan rual loha chakin an kal mek - inelna hrang hrangah match 22 chhung hneh loh nei loin an kaltluang mek.

Spanish manager Pep chuan, "Ka naute inkhel entu nih a nuam ta hle. Team ṭha tak hneh chungin last 16 kan lut thei a, duhthusama ṭhain kan khel a ni. Kan inkhel khaikhawmna awlsam ber pakhat chu 'wow' a ni," tiin a sawi. City hian Cham­pions League group match li an khelhah hnehna an chang vek.