Real Madrid ngamtu Spurs an tlang

Champions League nomawi chawi hnem ber leh champion lai ni bawk Real Madrid chu Tottenham Hotspur lakah 1-3 in an tlawm.

Mauricio Pochettino nauten Spanish champion laka hnehna hlado chham chungin last 16 an inhlangkai - vawi ruk an intawn tawha an chak vawi khatna a ni.

Group H inkhel dangah Borussia Dortmund leh Apoel Nicosia te 1-1 in an inhnehtawk.

Spurs hian point 10 hmuin group hmahruaitu an ni a, an hnuai chiaha awm Real Madrid aiin point thumin an sang zawk; Dortmund leh Apoel ten point hnih ve ve bak an la neih loh avangin Real hi tlang chho tho tura ngaih an ni.

Spurs an hriam

Tottenham tan malpui hliam vanga Manchester United hmachhawn thei lo Harry Kane a dam tawh a, Spurs striker rinrawl hian inkhel bul a ṭan. Goal hmahruai khungtu erawh midfielder ṭhangduang Dele Alli a ni. England international Alli hian Kieran Trippier-a cross chu hnai deuh aṭangin a tlawh lut.

Second half ṭantir lamah Alli bawk a inlar leh, kum 21 mi Alli hian huaisen taka ball a tlan luhpui hnuah goal lamah a pet thut a, Real Madrid captain Sergio Ramos chuan an lamah a dang pial lut. Wembley Stadium chhungah Spurs fan-te thawm a ring a, mikhual lam an reh duk thung.

Real defender ten Kane an ven lutukna lamah Christian Eriksen an ngaihthah. Kane hian mual sir lama a ball chan chu a laiah pet chho thutin Spurs midfielder hlui Luka Modric-a'n Eriksen a veng hneh lo - Denmark international mdfielder hian minute 65-naah an goal thumna khungin Spurs chu dinhmun himah a dah.

Hun tawp hma minute 10 chauh a awm tawh tihah Cris­tiano Ronaldo chuan buai nuaih kar aṭangin goal khat a khung hram, Portugal captain hian Spurs laka a goal 10 khungna a ni; he goal hian Real chu phurna pe thar leh mahse insiamṭha leh tur chuan a tlai zo tawh - khualmualah Real leh Zinedine Zidane an tlawm chiang hle.

Rinkai Spurs

Season hmasa khan Totten­ham hian Wembley-ah AS Monaco leh Bayer Leverkusen te an ngam lo a, group stage an paltlang zo lo. Europa League lamah pawh club langsar tak ni lem lo Gent hneh loin round of 32 aṭanga pet tlak an ni.

Champions League draw neih a nih khan Real Madrid leh Dortmund te nen an awmkhawm vangin Spurs hi tlan tura rinkai an ni lem lo. Mahse, Spanish club leh German rallian hi an mualah an an sawp ve ve thei a - manager Mauricio Pochettino chuan European club ṭha zingah an tel thu a sawi ta riap mai.

Tottenhman manager Po­chettino chuan, "England-ah chauh ni loin Europe club ṭha zingah kan tel tawh. Hnehna chang chunga round sang zawk kan luh avangin a lawmawm a, chutihrualin tuna kan thlen chin hian nomawi a la keng tel lo tih kan hriat a ṭha. A pawimawh chu kan match neih leh huna hnehna chan leh a ni," tiin a sawi.

Tun dinhmuna Spurs tana chanchin lawmawm lo awm­chhun chu defender Toby Alderweireld inhliam kha a ni ang. Belgiun international hi malpui hliam vangin minute 24-naah lakchhuah a ngai a, kartawp league match-ah an chhawr theih a beisei awm loh.

Zidane a zam lo

Real Madrid manager Zine­dine Zidane chuan Tottenhman hneh lo mah se an tlachhe ta duai tihna a nih loh thu a sawi. Real hi last 16 lut turin an dinhmun a la ṭha tawk a, chutihrualin Champions League group stage bikah match 30 zet hneh loh nei loa an kaltluang a tawp tak avangin inbihchian erawh an ngai.

A zawna Champions League nomawi chawi thei Zidane chuan, "Kan tlachhia tihna a ni lo, inkhelah chuan hun ṭha vawi hnih kan neih zinga vawi khat kan ti hlawhtling thei a nih chuan hnehna a chan theih. Tun ṭumah kha chuan nidanga kan khel kan phak loh bakah kan vannei tawk lo bawk, ṭha takin kan khel leh thei ang tih ka chiang," a ti.

Spanish champion Real hian ball chang tamin goal khung tumin pet ngun zawk mah se an tlarhma an hriam lo a, Spurs lamin counter attack aṭanga an nawr letin an tlarhnung a phui lo hle bawk. Hei erawh hriat tel a ṭha ang; Real Madrid hian hliam vangin Keylor Navas, Dani Carvajal, Raphael Varane, Mateo Kovacic leh Gareth Bale te an chhawr thei lo.

Real Madrid captain Sergio Ramos chuan, "Kan thi tawh nia ngaitute ngaihdan dik loh zia lantir nan ṭha takin kan rawn kir leh ang," a ti a. Tottenham aṭang­a La Liga club lian zawm­tu Luka Modric pawhin har­satna paltlang hnua ropui taka thawh chhuah leh chu Real Madrid zia a nih thu a sawi ve bawk.