MFA-in lawmpuina hlan

Mizoram Football Association chuan FIFA Under 17 World Cup-a India player Lalengmawia (Apuia) chu No­vem­ber 1, zan khan Lammualah lawmpuina an hlan.

FIFA Under 17 World Cup-a doping control officer Dr Lalzarmawia Khiangte (Mapuia) hnenah MFA chuan lawmpuina a hlan bawk a, MFA senior vice president PC Vanlalhruaia'n lawmpuina thuchei a hlan a ni.

Lawmpuina thilpek hlantu Mizoram Football Association honorary secretary Lalnghinglova Hmar (Tetea) chuan, "Mizo zinga World Cup khel phak kan awm ta hi MFA chuan lawmawm a tiin a chhuang takzet a, a kalkawngah theihtawp chhuaha kan buaipui tawh piah lamah a kal zelna turah duhsakna kan hlan a ni," tiin an lawmpui thu a sawi.

Tetea Hmar chuan sawi chhun­zawm­in, "Lalengmawia hi kan footballer

ṭhahnem tak zinga mi a ni a, footballer hlawhtling ni tura inzir mek chauh a ni a, hei vang hian zanina kan programme pawh hi keini dah danah chuan lawmpuina a ni a. Mizoram mipuiin kan hriat tel atana kan duh chu Apuia leh a ṭhiante hi football-ah chuan inzir mek an ni a, star chei bawl anga chei bawl vak te, ropui tak leh hlawhtling tawh anga han buaipui chiamte hi a la hun loin kan hria.

"An la kal dawn chauh a, a hun hmaa in tihlar chiam leh in chawimawi chiam hian kan thlen tur ang min thlentir lo thei a ni tih kan kal tawh aṭangin kan inzir chhuak tawh a ni," tiin chawimawina ni lo a lawmpuina an hlan chhan a sawifiah.

MFA honorary secretary chuan, Mizo tana history siama FIFA World Cup a khel thei chu an chhuangin an lawmpui takzet thu a sawi a. MFA hian Lalengmawia hi thuchei leh Rs 10,000 a hlan a ni.