Chhinga Vengin Ramhlun N hneh thei lo

Minute 90-ah pawh Chhinga Veng FC-in Ramhlun North FC lakah 1-0 in hma an la hruai a, minute 90+2 a zo a, 1-1 a ni.

Mizoram Premier League Season 6 hmahruaitu Chhinga Vengin coach thar Lalsangzuala Hmar hnuaiah MFA Super Cup leh I Day Football nomawi an chawi tawh bakah MPL6 semifinal tling hmasa ber ni mah se Ramhlun North lakah hnehna an chang thei chuang lo.

November 1 zan inkhel­ah Chhingcows hian Lalram­muan­puia hmangin goal an khung hmasa a, Ramhlun North-in Lal­liansanga hmangin injury time-ah an sut.

Chhingcows ṭantuten mak tia thil awm dan an thlir laiin Ramhlun North ṭantute thawm erawh a ṭha hle.

Mi thar John

Ramhlun North-in Liberian midfielder Harry Delono Harris thlakna atana Calcutta Customs Club aṭanga an lakluh John Kweku Ampong chu bul an ṭantir nghal a, Ghanaian midfielder John hian a thiamna pholang mah se fitness a nei ṭha tawk lo tih a lang.

Coach Samson Ram­­­eng­mawia'n a ring tawk a, ball pet a thiam avang­­in a khel a hmuhnawm a, amaherawhchu MPL khel turin a che rang tawk lo. Ghanaian midfielder hian semifinal luh inchuha Chanmari FC nen an inkhelh hunah chuan theihna sang zawk a lantir thei tawh ang.

Chhingcows an bil

Chhinga Veng hian semifinal an lut tawh a, amaherawhchu an khingpui Ramhlun North an nih avangin an player neih

ṭhat an dahlut.

Malsawmfela'n bul a ṭan a, ball sem turin R. Mal­sawmtluanga dah luh a ni.

Chhingcows hian minute 45 chhungin goal an khung thei lo a, minute 55-naah Apuia hmangin goal an khung hram. MPL6-a de­fender langsar ber zinga mi R. Laldinliana cross chu Apuia hian goal-ah a chantir a, Armed Veng South tlangval pahnih an thawk dun ṭha hle.

Goal luh hnuah Ramhlun North ṭantute an nguai a, Chhinga Veng thawm a lian thung - Lalsangzuala Hmar hoten hnehna an chang ngei dawn niin a lang hman hial.

A tawpah goal

Fourth official-in injury time-ah minute hnih pek belh a nih thu a rawn tar chhuak a, Ramhlun North khel a la nung chuang lo.

Amaherawhchu hun tawp hma hretin Korhena A. Boekai hmangin Ramhlun North-in an nawr a, Liberian defender hian Chhinga Veng captain Lalrinchhana ball clear chu tauh letin Chhingcows defender K. Lalthlahlova'n pet pha lo chiahin Lalliansanga'n (Notea) chiang zetin a pet goal.

Referee Lalthangliana Hnam­te-in Chhinga Veng tan sutna hun a siam tawh lo a, goal luh rualin hun tawp ham rik a ham zui nghal. Chhingcows ṭantuten mak tiin an khingpuite lawm lai an thlir a, MPL an khelh ṭan tirh aṭanga an châk ber pakhat Ramhlun North hneh chu an la tipuitling thei lo.

Engtin zel?

Ramhlun North ṭantuten au hla atan 'Chhinga Vengin min hneh thei lo' tih an la hmang thei zel dawn a, point an hlawh chhuah danah an vannei tih phat rual ni lo mah se coach Samson-a chuan an inrul tawk chiah thu a sawi thung.

Samson Ramengmawia chuan, "Kan intawn hmasak ṭum khan injury time-ah tho min sut a, tun ṭuma injury time-a kan sut nen hian a inrul tawk chiah a ni," tiin Vanglaini a hrilh.

Chhinga Veng hian first divi­sion aṭangin Ramhlun North lakah hnehna an la chang lo a, team pahnih hi semifinal-a intum thei an la ni.