Ashish Nehra a chawl ta
Kum 18, hliam 12, captain pariat - hei hi Indian bowler Ashish Nehra zinkawng hrilhfiah theih dan awlsam ber a ni. India tan kum 18 chhung ngawt a khel a, hliam vangin vawi 12 ngawt zai a tawk a, captain pariat ngawt a hrawn hman - chutiang khawpa chanchin ngaihnawm nei bowler chuan international cricket chu Nilaini zan khan a mangṭha ta a, India jersey pawl nen a hmel kan hmu leh tawh dawn lo.
Nilaini zan khan India hian Twenty20 international-ah New Zealand chu run 53-in an hneh a, Nehra tan India tana a inlan hnuhnung ber a ni. India leh Kiwis hian ODI series an khel dun tawh a, Men in Blue hian 2-1 in series an la. T20 series pawh hi match thum khelh tur a ni a, Inrinni zanah an match hnihna an khel leh ang.
Inkhel chu
Delhi khawpuia inkhelah India an bat hmasa zawk a, opener pahnih Rohit Sharma leh Shikhar Dhawan ten run 80 ve ve an siam nghal avangin batsman dang tan hna a harsa tawh lo. Over 20-ah India-in run 202 an siam a, wicket thum chiah an hloh.
New Zealand bat hun a thleng a, Indian opener pahnihte run siam belhkhawm 160 a nih laiin Kiwis opener Martin Guptill (4) leh Colin Munro (7) te run siam belhkhawm zat erawh 11 a ni a, rei an khelh hmain chak tur a chiang tawh. New Zealand hian over 20-ah run 149 chiah an siam a, wicket riat an hloh - India tana a match hnuhnung ber kheltu Nehra-a'n wicket lak a nei lo a, over li a vawmah run 29 chiah a pe thung.
Nehra sulhnu
Kum 38 mi fast bowler hian February 24, 1999 khan Sri Lanka lakah a test match hmasa ber a khel a, hliam vanga a nih tur ang ni phak lo bowler hian test cricket erawh a chawlhsan vat a, kum 2004 khan a mangṭha - test match 17 a khel hman. Nehra-a'n kum 2001-ah a ODI match hmasa ber a khel leh a, vawi 120 a inlanah wicket 157 a la thei.
Nehra-a'n kum 2003 World Cup-ah a career-a a vawm ṭhat ber ṭum a tawng a, India chhandamtu a ni. Delhi tlangval hian England nen an inhmachhawn ṭumin over 10-a vawmah wicket ruk lain run 23 chiah a pe - khawvelin he fast bowler che vel hi hmuhnawm ti takin a thlir. England an hmachhawn hmain Nehra a inhliam a, mah se a hunah tak mamawh chhanna a ni tih a pholang - India rama cricket khelh a nih chhung chuan he bowling ropui hian sawi a hlawh reng ang.
Mangṭha Nehra
Indian bowler Nehra chuan, "Ka lung a leng dawn khawp mai. Mahse, tunah chuan hahdam takin ka taksa a chawl tawh ang. Kum tam zawk la khel thei ka ni a, mah se tun hi in mangṭhana hun ṭha ber chu a ni. Kum 18 chhung India tan ka khel a, hei aia ropui zawk beisei tur ka nei chuang lo. Ka thutlukna siam tawh zawng zawngah inchhirna ka nei lo a, engtiklai pawh hian ka hlim a ni,"a ti.
India captain Virat Kohli chuan, "Ashish unaupa, i hmalam hun atan duhsakna sang ber ka hlan che. Nang nena khelmual pawn leh chhunga hun hman dun kha a nuamin chawimawina ropui tak a ni," a ti a, cricket legend Sachin Tendulkar chuan, "A phu ang ngeiin Nehra chu thlah liam a ni ta. Nang leh i chhungte duhsakna sang ber ka hlan che u," tiin a ṭhianpa a thlah ve bawk.