Mayweather hneh theih inringtu McGregor

Conor McGregor chuan August thlaa a ngam loh tak Floyd Mayweather chu inhmachhawn nawn pui leh ngat se chuan a hneh theih tawh a inrin thu a sawi.

Irish fighter chuan, "Mayweather nen hian inhnek leh ila chu ka tihdik loh aṭang te khan ka inzir tawh ang a, ka hneh theih ngei ka ring. Mahse, ani chu tunah a chawl tawh a, inhnek tura cho chhuah leh hi ka tum lo. Ama duhthlannaah engkim a innghat a, a duh leh a nih phawt chuan ka hmachhawn leh ang a, ka hneh tawh ang tihah hian rinhlelh tur a awm lo," a ti.

McGregor chuan Mayweather nen an inbiak zui loh thu sawi nghalin, "Kan inhnek zawh lamah kha chuan Mayweather nen hian kan indawr leh tawh lo. A hnathawh ropui tak avangin ka zah a, mi 50 hmachhawna hnehna chan vek hi a ropui a ni. Mahse, lo kira min hnek leh a duh phawt chuan ka inpeih e," tiin hnehna chan tawh a inbeisei.

UFC lightweight champion chuan boxing ring rap ve zuai mah se a hmangaih hmasa UFC kalsan a tum loh thu sawiin, "Ka fight hmachhawn leh hmasak ber tur chu UFC-ah a ni ang a, ka lightweight kawnghren hi humhim ka tum ang. Boxing hi chu ka tuina pakhat ve mai a ni," tiin boxing luhchilh chhunzawm tura an sawi chu a pha.