Toure-a'n Drogba a thlawp

Yaya Toure chuan Ivorian Football Association (FIF) president an thlan tur atan Didier Drogba a thlawp thu a sawi, hruaitu ni tura a chuhpui Sory Diabate leh FIF vice president Idriss Diallo te aiin a teammate hlui a duh zawk.

Ivory Coast hian an ram FA hruaitu an thlang thar dawn, mahse Covid-19 vangin an la inthlang thei rih lo. Ram tan match 105 a khelh aṭanga goal 65 khungtu Drogba hian president nih a tum.

Drogba a thlawp thu sawiin Toure chuan, "Kan ram football kalphung thlak a hun, tunlai mila a kal a ngai. Drogba ka thlawp, ka thlawp thu ka sawi hian kan ram tana ṭha tur thil ka sawi tihna a ni.

"Didier hi ka inkhelh pui, ka ṭhian leh ka captain a ni. Mi tam tak chuan a ṭhat tawk lohna leh a tlin lohna lai an sawi tih ka hria, kei pawhin a ṭha famkim chu ka ti bik lo, mihring famkim an awm ngai lo," tiin a sawi.

Barcelona leh Manchester City midfielder hlui Toure hian African Footballer of the Year ni tawh Drogba thlawp mah se, Ivory Coast player player tam tak chuan Sory Diabate an thlawp zawk thu an sawi ve thung.