Padma Shri dawng thei zingah Srikanth

Union sports minister hlui Vijay Goel chuan civil mite chawimawina sang palina Padma Shri dawng thei turin badminton khel thiam Kidambi Srikanth chu a nominate.

Sports minister a nih hnua parliamentary affairs minister nihna chelhtu Goel hian Nilaini khan union home minister Rajnath Singh hnenah lehkha thawnin Srikanth hi chawimawina sang dawn phua a hriat thu a sawi.

Indian shuttler Srikanth hian season duhawm a hmang, tun hnaiah a zawnin Super Series titles a la thei a, Indian player zingah kum khat chhunga Super Series titles pali la thei hmasa ber niin, khawvel huap pawhin palina chiah a ni bawk.

Goel chuan, "Tunlai-ah khawvel ram hrang hrangin sports tih hmasawn tumin hma an la nasa a, tun dinhmunah chuan Srikanth hi Indian naupangte tana entawn tlak an idol chu a ni, chawimawina dawn hi a phu," tiin a sawi.