Monaco leh Leipzig dinhmun a chhia

Besiktas chuan a vawi khat nan Champions League last 16 an lut ngei dawn niin a lang ta. French champion AS Monaco leh RB Leipzig te erawh an che fuh hleithei lo - group stage paltlang beiseina a tlem ta hle.

Thawhlehni zan khan Turkish champion Besiktas hian Monaco lakah goal khat phur hmasa mah se forward Cenk Tosun hmangin an sut a, point 10 hmuin Group G hmahruaitu an ni.

Table mawngphaha awm Monaco manager Leonardo Jardim chuan, "Kan khel chhe loah ka ngai, mikhual tan inkhelh harsatna hmunah kan lut a, point kan hmu thei kha a lawmawm. Match hnih khelh tur kan la nei a, beidawng loin kan beih chhunzawm ang," tiin a sawi.

Season hmasa semifinalist Monaco hian an match hnuhnung pahnihah hnehna chang pawh nise knock out round an lut ngawt tawh dawn lo, an chunga awm Leipzig emaw Porto emaw zawkin point an hloh tel a ngai tawh dawn a ni.

Inkhel dangah Porto chuan Danilo Pereira, Hector Herrera leh Maxi Pereira te goal hmangin an mikhual Leipzig chu 3-1 in an hneh. Season hmasa Bundesliga pahnihna Leipzig hian European football an khelh vawi khatnaah hian an match hmasa paliah ṭum khat bak hnehna an la chang lo.