F1 an tlan lo mai thei?

Formula 1 chairman Chase Carey chuan hri leng vanga hun harsa an tawh dan a thlir a, tun season chhungin car intlansiakna sang ber hi neih loh mai theih a nih thu a sawi chhuak.

F1 team neitu hi an inhmukhawm zauh zauh tawh a, thu chiang erawh an nei thei lo. Sum hloh theih a tam a, inelna neitu Liberty Media Corporation lam erawh chuan neih hram an duh.

Chase Carey chuan, "Intlansiak turin kan inringtawk, mahse world championship kan nei ngei ang tih erawh engmah a chiang bik lo," tiin a sawi. F1 thuneitu lam chuan kumin thla hmasa pali aṭanga an sum hmuh beisei zinga 84% an hloh thu a sawi.

Season hmasa khan F1 hian kumtir lam thla li chhungin pound maktaduai 199 an lalut hman, kuminah erawh pound maktaduai 31.6 vel bak an lalut lo - hri leng hian a la tibuai chhunzawm rih dawn niin a lang.

Season tir lama tlan tur Australian leh Bahrain Grand Prix te chu an ṭhulh fel tawh, sum lakluh a tlem hi a mak lo. Intlansiak dang pasarih pawh a hun sawn a ni tawh a, tun season calendar chu siamṭhat ngei a ngai dawn.

A tira ruahman dan chuan tun season chhungin intlansiak 21 neih tur a ni. Amaherawhchu, tun dinhmunah chuan engmah a chiang ta lo. F1 world championship pangngai nei tur chuan a tlem berah intlansiak pariat tal an neih a ngai.

Tunah chuan intlansiak 15-18 vel neih theih an beisei. July thla hian Europe-ah tlan ṭan theih chuan, a hnu lamah Eurasia, Asia, America leh Middle East-ah tlan lehin; December 13 velah season khar theih an inring.

F1 chairman Carey chuan, "Europe-ah chuan fans an awm thei dawn lo chiang, khawmualpui dangah erawh a theih hram chuan fans awm thei se tih chu kan duhthusam a ni," tiin a sawi.