United lak tum Haaland-a'n Dortmund a zawm

Borussia Dortmund chuan Erling Braut Haaland chu Red Bull Salzburg aṭangin December 29 khan an lakluh thu an puang. German club hian kum 19 mi Haaland lalut tur hian Salzburg-in buyout clause-a an dah zat euro maktaduai 20 (£17.1m) an seng a ni.

Leeds leh Manchester City player hlui Alf-Inge Haaland-a fapa Haaland hi Leeds-ah a piang a, Manchester United leh Juventus nen pawh an sawi zawm. Norway internaitonal hi Molde aṭanga chawr chhuak niin nikum January khan Salzburg a zawm a, Austria top division-ah match 14 lekah goal 16 a khung bakah Champions League group stage-ah goal riat zet a khung. Nimin khan Haaland hian a club thar Dortmund hi a zawm. Norwegian striker chuan, "Dortmund ṭantu mipui 80,000 hmaa inkhelh hi ka châk tawh takzet a ni," tiin a sawi. Dortmund chief executive Hans-Joachim Watzke pawhin sawmtu tam tak kara Erling Haaland an chang thei chu lawmawm a tih thu a sawi bawk.

Bundesliga-in thlasik chawlh an neih avangin Haaland-a'n competitive match a la khel rih dawn lo a, German club-in January 18-a Ausburg an tlawh hunah match hmasa ber a khelh theih besei a ni.

United tan erawh Haaland an chang lo hi channa nasa tak a ni. Chutihrualin Haaland-a pa Alf-Inge Haaland leh a agent Mino Raiola ten an hralhchhuah lehna tura sum chan an tum a, hei hi United-in an pawm thei lo. Transfer-a sum insem leh dan chungchang hi Dortmund lam erawhin thuchhuah an siam lo thung. Dortmund hian Haaland an lakluh takah chuan Jadon Sancho chhuak tura sawi thawm a ri ring nghal a, England winger hian kum 2022 thleng German club-ah hian contract a nei. Kum 2017 khan Dortmund hian pound maktaduai riat lekin Man City aṭangin Sancho hi an lalut a, German club hian Sancho aṭangin sum hlawm ṭhahnem tak an hailut thei ang.

Kum 19 mi Sancho hi England club lian ho bakah Real Madird leh Barcelona ten an duh vekah an ngai a, Man City hi an player hlui  lalet turin an dinhmun a ṭha hle. Man City hian an hralh chhuah hmaa contract an ziah tawh angin club dang ngamna zata an ngam a nih chuan an lalut 

thei dawn.