Intlansiak 16 neih an beisei

MotoGP organizer Dorna Sports chuan tun season hman ngei an la beisei a, intlansiak 16 neih theih an inring. Bike intlansiakna sang ber hi July thla a neih ṭan theih an inring bawk.

Kumin MotoGP season calendar an siam tirh kha chuan inelna 20 neih an tum. Mahse coronavirus vangin March thla a tlan tur hi an la tlan ṭan thei lo, intlansiak awm mah se a pangngai chuan kal theih a ni tawh dawn lo.

Dorna Sports chief executive Carmelo Ezpeleta chuan, "Europe ni lo khawmualpui dangah inelna kan nei thei a nih chuan intlansiak 12 aṭanga 16 chu a awm theih a rinawm.

"Tunah chuan Spain rama Jerez circuit tlang kawngah July thla hian inelna neih kan tum a, chumi tur chuan tih tur ṭul leh pawimawh kan buaipui mek zel. Tuna kan rin dan chuan June thlatir lamah chuan calendar thar tih chhuah theih a beisei awm bawk," a ti.

Ezpeleta chuan sawi zawmin, "Spain rama inelna kan neih hma hian rider bakah team tana hna thawktu zawng zawngte chu inelna neihna tur hmun an pan hmain Covid-19 an kai em tih enfiah hmasak vek an ni ang.

"Hri leng hi kan thunun theih piah lam a nih avangin engmah hi chiang taka sawi lawk theih erawh a ni lo. Ruahmanna tam tak kan siam thlawn tawh, calendar ngei pawh hi kan siamṭha zing tawh hle," a ti.