Mangṭha Barca; in tan Champions League a sang lua e!

Barcelona-in sum tam tak leh hming ṭhat an thlang kawp a, mahse, a pahniha neih chu Barca tan thil harsa tawpkhawk a ni a, a pahniha chân kawp thei dinhmunah an ding mek.

Nilaini zan khan Inter Milan chuan an mikhual Viktoria Plzen chu 4-0 zetin an sawp a, Champions League last 16 an lut - he result-in a ken tel chu Barca tan beisei tur a awm tawh lo, tih chu a ni.

Italian club tan Edin Dzeko chuan goal hnih khungin, Henrikh Mkhitaryan leh Romelu Lukaku ten goal khat ve ve an khung a, match khat khelh tur la awm mah se Barca tan umphak ngaihna an awm tawh lo.

Barcelona-in Champions League aṭangin an tla tih inhre sa chungin Bayern Munich an mikhual zui a, an hliam na laiah German champion-in chi an phul belh a, Barca an mualpho - Sadio Mane, Eric Maxim Choupo-Moting leh Benjamin Pavard goal hmangin Bayern hi 3-0 in an chak.

Barca veltu
Nilaini zan Champions League inkhelah Inter Milan leh Viktoria Plzen an intawng hmasa - Inter an chak chuan, Barca-in an hmabak match hnihah hnehna chang pawh ni se, head-to-head a chhe zawk Barca-in an tlang thei dawn lo tih an hria.

A tawi zawnga sawi chuan Barca-in thilmak a thlen an beisei a, an beiseina erawh minute 35-na lekah chhem boin a awm nghal - Mkhitaryan chuan Alessandro Bastoni cross aṭangin goal hmahruai a khung a, Viktoria laka shot an neih 10-naah goal an khung chiah!

Inter-in goal an khung rualin chak tur a chiang deuh nghal a, Barca fans an ṭanp ṭan - beisei tibo lehzual turin Dzeko chuan minute 42-naah a belhchhah a, second half minute 10-naah Mkhitaryan-a'n post tihper mah se minute 66-naah kum 36 mi Dzeko a inlar leh a, an goal thumna a khung.

Italian club-in zahngaihna an lantir lo. Malpui hliam vanga August hnua la inlan leh lo Lukaku chu minute 83-naah luhtir a ni a, minute li chiah khelmualah hun a hmang hman tihin a khung ve leh a, Inter an tlang - Barca an tla thung!

Mangṭha Barca
Nou Camp-ah beisei tur an nei tawh lo inhre sain Barca an inlan a, Robert Lewandowski hoin rawn inlan mah se Bayern lakah an tlawm nawn - Allianz Arena-a an intawn hmasakah 2-0 in an tlawm tawh bawk.

Bayern tan Mane chuan minute 10-na lekah goal hmahruai a khung a, Choupo-Moting chuan minute 31-naah a belhchhah - chak tur a chiang hma! Pavard chuan hun pek belhah chak nemnghehna a khung zui a, Barca an mualpho.

German champion goal khung pathum hi Serge Gnabry siamsak vek a ni a, assist hattrick a siam tihna a ni. Barca erawhin vawi kua zet shot an nei chungin goal zawna kal a awm miah lo a, Lewandowski pawh a reh hle.

Polish striker hian minute 45-naah Matthijs de Ligt-a'n a tih tluk avangin penalty a beisei a, mahse, referee Anthony Taylor-a'n video assistant a rawn hnuah a thutlukna a sut a, Barca an vanduai.

Sorry Lewy
Kum 34 mi Lewy-a'n Bayern tan match 375-ah goal 344 zet khungin, nomawi chawi theih zawng zawng chawi mah se Ballon d'Or dawn a duh a, a kawng awlsam zawkah ngaiin Barcelona a pan.

Polish striker hian Barca tan match 16-ah goal 17 zet khung leh der tawh mah se Champions League aṭanga an tlak miau avangin Ballon d'Or a hla leh ta sawt tih hai rual a ni lo a, Lewy-a'n thutlukna a siam fuh lo.

Bayern tana a khelhpui ṭhin Thomas Muller chuan inkhelh hmain, "Lewy, kan lokal e," tiin social media-ah a tarlang a, Muller chuan, "Lewy nena intawn leh hi a nuam a, mahse, hlawhtlin duha tuihal reng a ni tih hretu tan chuan a khawngaihthlak hle a ni," a ti.

Barca boss Xavi chuan, "Kan tla tih hre saa kan inkhelh avangin a harsa a, chhuanlam erawh a tling lo. Bayern kan el phak lo a, kan tan chuan a na a ni. Mahse, he team chunga rinna kan nghah zel a ṭul a, nomawi beisei theihna dang kan la nei a ni," tiin a sawi.