Goal thum khungtu Liverpool an harh?

Nottingham Forest laka 1-0 a an tlawm hnuah Liverpool fan-ten lawmna tur an nei ve leh ta a, Ajax lakah 3-0 ngawta hnehna changin, Champions League last 16 an lut.

Amsterdam khawpuia inkhelah Liverpool tan Mohamed Salah, Darwin Nunez leh Harvey Elliott ten goal khat ṭheuh an khung a, Dutch club-in a chhanletna tur an nei loh avangin Reds an tlang.

Group A inkhel dangah Napoli chuan 3-0 in Rangers an hneh ve bawk a, Giovanni Simeone chuan goal hnih khungin, Leo Ostigard chuan goal khat a khung bawk a, Scottish club-in a chhanletna tur an nei lo.

Liverpool leh Napoli hi November 1 zanah an intawng dawn a, Reds tan group hmahruaitu ni chunga last 16 lut tur chuan Italian club lakah si li fai tala chak a ṭul ang.

Reds an vannei
Johan Cruyff Arena-a inkhelah Liverpool-in goal thum ngawt khung mah se, an vannei tia sawi ngam a ni - goal an khung hmain Ajax tan Steven Berghuis chuan hnai set sawtah chance duhawm a nei a, mahse, post a pet per.

Reds tan tlang turin draw a tawk a, mahse, Ajax khelh dan enin thla a muang lo. Dutch club hian Berghuis leh Jorge Sánchez hmangin chance an nei leh a, mahse, chance hlauhawm tak, tia sawi tur erawh a ni lo.

Minute 30-naah Ajax tan Dusan Tadic chuan hun duhawm a tawng leh bawk a, mahse, a awmna tur taka lo awm, Reds full back Trent Alexander-Arnold chuan Tadic-a shot a lo dang a, Liverpool an him.

Liverpool fan-te hlauhthawng reng rengin inkhel an en a, mahse, minute 42-naah a hun têa rah ṭhin Salah bawk a rawn inlar - Egyptian forward hian captain Jordan Henderson-a siamsak ṭha zet chu cool takin goal-ah a chantir a, player class a ni, tih min hmuh nawntir.

Liverpool channa
A tir lamah Merseyside club an hlauthawng a, goal an khung hnuah erawh thlamuangin an khel - mahse, minute 44-naah pound maktaduai 64 man Nunez chuan goal ruakah a khung lo a, a siamsaktu Roberto Firmo leh ṭha zeta ball tlan luhpuitu Andy Robertson tan a ngeiawm hial mai thei!

Mahse, hei hi Liverpool tawpna a ni lo - minute 49-naah Nunez-a chance neih chu Ajax keeper Remko Pasveer chuan a dansak a, corner a chawi. Robertson chuan corner hi petin, Nunez-a'n a lo tauh goal a, Pasveer-a'n a dang nawn tawh lo.

Liverpool-in an la duhtawk lo cheu. Minute thum chiah a liam hman tihah Salah siamsak chu Elliott chuan goal-ah a chantir ve leh a, 3-0 a nih avangin chak tur a chiang tawh.

Ajax tan Jurrien Timber chuan chance nei ve leh mah se goal-ah a chantir thei lo a, hun tawp thlenga goal dang lut tawh loin Liverpool an chak a, a zawna vawi ruk nan Champions League knockout round an lut.

Chhunzawmna tur
Inkhel pumpui thlirin, Liverpool-in chak an phu zawk a, tun season Champions League-a an match hmasa berah 4-1 ngawtin Napoli ngam lo mah se, a zawna match li an chak avangin an mualphona chu an hliahkhuh hneh hle.

Liverpool tan tun season-a khel ṭha lo Arnold a ṭangkai a, Robertson a hmuhnawm bawk - khawvela full back inkawp fuh ber anga tam takin an ngaih pahnih hi, an ṭhat dan bera an khelh chunzawm zel thei a nih chuan Reds tan danglamna an thlen thei ang.

Ajax lakah a tirah talbuai deuh mah se Hendo tawnhriat neih ṭhat a ṭangkaizia hmuh turin a awm leh ta a, Salah-a'n rintlak a la ni reng tih a pholang a, Diogo Jota leh Luis Diaz inhliam mah se Nunez-a'n a ṭhiante awm loh hlana rintlak a nihzia a pholang.

A tawi zawnga sawi chuan Liverpool an ṭha tawk a, a pawimawh ber erawh an ṭhat dana an khelh chhuah theih reng a ni - tun dinhmunah chuan he club hian tluk leh din fawmin an la khel a, rin ngam an la harsa rih hle.

Champions League knockout round luh hi thil harsa a ni a, tumahin thil nih ve dan tur renga ngaih chi a ni lo. Last 16 kan lut leh ta a, kan hnathawh hi a ropui takzet a ni. He result hian kan team min pui ang em? Hetiang thil sawi reng hi thil ṭul pawh a ni lo - club tan chuan hnehna chan hi a ṭha a, kan zavaia tan a ṭha a, min tiphur em em ang. Nuam kan ti em em vek a ni. - Jurgen Klopp, Liverpool manager