Mumbai hneh kan beisei - Puitea

Kerala Blasters midfielder pawimawh K. Lalṭhathanga (Puitea) chuan zanin dar 7:30-a an tawn tur, Mumbai City hneh theih an inbeisei thu Vanglaini a hrilh.

South Indian club hian tun season ISL-a an match hmasa berah East Bengal chu 3-1 in an hneh a, mahse, a hnu match hnihah ATK Mohun Bagan (5-2) leh Odisha (2-1) an ngam lo.

Puitea chuan, "Season hmasaa kan ṭhatna tlarhnung a phui hleithei lo a, game thumah goal riat kan chhuah a, a tam hret tawh - tlarhnung insiamṭhat a ngai," a ti a, goal ven kawngah hmasawn an mamawh tih Vanglaini a hrilh.

Bethlehem Vengthlang tlangval Puitea chuan sawi zawmin, "Mahni khelmuala khel tur kan ni a, fans puihna nen hnehna chan ngei kan inbeisei. Mahse, ISL-a team ṭha ber an ni a, a awlsam lo ang," a ti.

Blasters hian season hmasa khan ISL final an khel a, a hma anga khel ṭha leh tur chuan insiamṭhat an mamawh hle - mahse, zanina an khelhna tur hi Jawaharlal Nehru International Stadium, Kochi a ni a, ISL bik atana fans 39,000 luh an phalna stadium-ah khat leh vek tura ngaih an ni.

Puitea'n tun season ISL match thumah bul a ṭan vek a, Mumbai City-in Lallianzuala Chhangte leh Lalengmawia Ralte (Apuia) an nei thung - Mizo player-in hmun pawimawh an channa team pahnih an ni a, zanin inkhel a hmuhnawm ang.