Chak zo lo Spurs hmabak a hautak

Hun tawp dawna Harry Kane-a goal khung hnawlsak a ni a, anmahni mualah ngei Tottenham Hotspur an chak zo lo. Antonio Conte naute hi Sporting Lisbon nen 1-1 in an inhnehtawk.

Champions League group D-ah Spurs hian point riat hmuin hma an hruai mek, an group match hnuhnung berah Marseille an lenchilh dawn. Ligue 1 club hi a hniam ber ni mah se, an intawn hunah an chak a nih chuan an la tlang thei - a ngaihnawm dawn.

Inkhel dangah Eintracht Frankfurt chuan Marseille 2-1 in an hneh ve thung a, pathumnaah an inhlangkai. Group D a team pali awm hian last 16 an la beisei thei vek a, tla thei vek an la ni bawk, match hnuhnung ber a pawimawh dawn takzet.

Inhnehtawk
Nilaini zan North London-a inkhelah mikhual lamin goal an nei hmasa, minute 22-naah Marcus Edwards chuan goal hmahruai a khung. Sporting tana goal khungtu hi Spurs lama lo inzir tawh a ni, a inzir chhuahna club a hrem.

Conte nauten first half an khel chhia a, goal khat an phur hi a mak lo. Fans lamin player an au el hial, second half-ah erawh an game a kang hret a, an vanneih zan ni se la chuan point thum hlawh chhuak thei dinhmunah an ding.

Hun tawp hma minute 10 chauh awm tawhah Rodrigo Bentancur chuan si phurh a sut zo a, phur chhunzawm zelin Kane-a'n chakna goal khungah a inngai, mahse VAR hman a nih hnuah an hnawlsak.

Goal an pawm loh avangin Conte a lawm lo, Italian manager hian a lungawi lohna nasa takin a lantir a, red card a hmuh phah hial. Match pawimawhah a naute a ho thei dawn lo tihna a ni a, dinhmun duhawm lo zawkah an la ding thei.

Lawmna rei lo
Ivan Pericic-a ball pet kang ṭha zet chu Emerson Royal-a'n striker Kane tan a tauh chho a, English striker hian angle zim takah chakna goal khungah a inngai. Last 16 an luh theihna goal a nih bawk avangin an lawm dan pawh a zual bik hle.

Mahse, VAR hmangin an ennawn a, goal khungtu Kane khan ball a dawn hmain a offside niin VAR lamin an hmu. Goal lawma lam Spurs player leh fans lam an ngui a, a sira awm manager Conte chu a tuartu langsar tak a ni bawk.

Tottenham defender Matt Doherty chuan, "Emerson khan ball kha a let deuh zawngin a tauh a ni si a, engtin nge offside a awm theih kha ka hrethiam lo. Kane kha ball hnung lamah a awm a, amah aiin defender kha a awm hnung zawk bawkin ka hria.

"Hnehna kan chang emaw kan ti a, nasa takin kan lawm hman. Mahse, a tawpah chuan eng nge lo thleng ta kha hriat nuam pawh a ni lo," tiin an goal an pawmsak loh chu a sawisel a, a sawisel avang erawh chuan point pek belh theih an ni tawh chuang lo.

Spurs buaina
Tottenham hi champion khat tak, nomawi chawi hleithei lo an ni. Conte lakah erawh beisei an nei sang a, fans lam pawhin beisei dan chintawk an hre lo pawh a ni mai thei, auhel ngai khawpin Spurs hi an awm em, tih erawh ngaihtuah tham a ni ang.

Premier League lamah pathumna an ni mek - Chelsea, Manchester United leh Liverpool te chungah an awm. Champions League-ah ni se group hmahruaitu an ni mek, tlang turin match hnuhnung bera point khat hmuh a tawk.

An dinhmun hi a chhe hran lo, mahse an buaina chu inkhel pawimawha an chesual khut ṭhin hi a ni. Conte hian UCL bikah anmahni khelmuala inkhel a hmachhawn hnuhnung 12-ah ṭum thum chauh chak ni hmel a hmuhpui.

Premier League lamah an kal tluang tih chu sawi nawn a ngai lo. Mahse, an hmelma leh elpui Arsenal an ngam lo a, team lian Manchester United leh indin thar Newcastle United an hneh lo bawk, thleng sang tur chuan inkhel pawimawha chak dan an hriat a ngai.