A zawna vawi li chak lo LA Lakers
Los Angeles Lakers tan mangchhia a la inchhunzawm zel. LeBron James awmna Lakers hian NBA regular season kal laiah match li an khel tawh a, an la tlawm fai vek - chak ni hmel an la hmu miah lo a nih chu!
Nimin zing inkhelah Lakers hian Denver Nuggets chu 110-99 in an ngam lo. Nuggets thiampuipa Nikoka Jokic chuan point 31 a nei; Ball Arena-ah NBA champion vawi 17 nei tawh Lakers an mualpho hle.
LeBron James-a'n point 19 a nei a, player ṭha dang Anthony Davis chuan point 22 a nei bawk. Mahse, chakpui nan a tawk zo lo a, match li an khelh hnuah hian Western Conference table mawngphah luahtu an ni.
Tun season NBA-ah hian chak ni hmel la hmu miah lo team pathum an awm. Lakers bakah hian Sacramento Kings chu Western Conference lama la chak miah lo an ni. Eastern Conference lamah Orlando Magic chu an khelh chinah an la tlawm fai vek bawk.
Inkhel dangah Giannis Antetokounmpo-a point 43 hmangin Milwaukee Bucks chuan Brooklyn Nets chu 110-99 in an hneh. Bucks hian match an khelh tawh zawng zawngah hnehna an la chang vek, inkhel tawp lam boruak sangah Nets coach Steve Nash chu hnawhchhuah a ni.
Chawlhlawk laiin Nets hian point 12-in hma an hruai thei. Mahse, third quarter bikah Antetokounmpo a inlar, Greek tlangval hian point 17 zet a neih belh a, an inkar a sawr zim bakah a team hmahruaipuiin a tawpah a chak zawk an ni daih.
Inkhel tawp lamah Antetokounmpo hi Patty Mills lakah a foul niin Nets lamin an ngai, mahse hrem a ni lo. Thil thlen danah Nets coach Nash a lawm lo a, a lungawi lohna a lantir uchuak deuh avangin an hrem ta zawk.
Nash chuan, "Ka naute tan chuan huai takin ka ding zel ang. A nihna takah chuan Giannis khan Patty lakah thil a tidik lo, match official khan chiang takin a hmu ngei ang," tiin thutlukna dik lo an tuar tih a sawi.
Inkhel dangah Portland Trail Blazers an chak lo, season kal laia an chak lohna hmasa ber ni tur hian Miami Heat chu 119-98 in an ngam lo. Heat lamah mimala point nei sang fal an awm lo, mahse mi paruk ngawtin point 10 chuang ṭheuh an neih theih chu an chakna hnar a ni.