Lewis Hamilton a beidawng?

Formula 1 champion vawi sarih ni tawh Lewis Hamilton chuan tun season chhungin chak ni hmel an hmu dawn lo niin a sawi. Mercedes hian intlansiak hmachhawn tur pathum chu an la nei thung.

Car intlansiakna sang berah Max Verstappen a champion chiang tawh a, a team Red Bull chu team champion an ni chiang tawh bawk. Champion chiang tawh mah se - Mexican, Brazilian leh Abu Dhabi Grand Prix an la tlan dawn.

Mercedes driver Hamilton hian 2007 khan F1 a luhchilh a, season tin vawi khat tal hnehna a la chang ziah. Tun season-ah erawh Red Bull an tluk lo a, team hlun Ferrari an tlan ṭhat bawk avangin Mercedes tan kawng a inhawng lo.

Britian tlangval Hamilton chuan, "A nihna tak sawi chuan season tluanin Red Bull hian car chak ber an nei, anni el phak tur chuan hmasawn kan ngai. United States GP kha en let ila, dinhmun ṭha taka kan din hnuah pawh kan chak thei lo chu a ni ber mai.

"Pathumna aṭanga bul ṭanin hnehna chang thei tur pawhin hun ṭha ka nei. Amaherawhchu, keimahni aia car tlan chak zawkin min um tlat chuan min tlan pelh hun a awm leh nge nge ṭhin," tiin a sawi.

Hamilton hian Texas khawpuia intlansiak an neih zawh khan, season tharah ropui zawka an kir leh theih a beisei thu a lo sawi tawh a. Tun season atan chuan beisei a nei sang tawh lo thung.

Mercedes driver chuan, "Kar tawpah intlansiak a awm leh dawn, keini lam chuan theihtawp kan chhuah leh ang. Mahse, team dang chet ṭhat loh kan chan tel a ngai tlat a, hnehna chang loa season kan hmang zo a nih pawhin a mak lo ang," a ti.