Second round-ah Medvedev leh Tsitsipas

Vienna Open khelh laiah Daniil Medvedev chuan set hloh loin hnehna a chang a, harsa vak loin second round a lut. A match hmabak erawh a hautak dawn, tawnhriat nei ṭha Dominic Thiem nen an intawng dawn a ni.

Russian tlangval Medvedev hian Nikoloz Basilashvili lakah 6-2, 6-2 in hnehna a chang. Austria rama inelna neihah hian, tualchhung tlangval Thiem chuan match point vawi hnih a inchhamhim hram a, harsa takin Tommy Paul chu 2-6, 7-6 (2), 7-6 (6) in a hneh.

World number 1 hlui Medvedev chuan, "Hun harsa leh khirhkhan kan hmachhawn zauh zauh a, chutiang kara hnehna ka chang ve leh ṭhin hi a lawmawm. Duh anga ṭhain season ka hmang thei lo, a tawp kharna erawh ṭha taka tih ka duh," a ti.

Russia leh Ukraine buaina vangin Medvedev hian Wimbledon a khel thei lo, grass court inelna lian a khelh loh bakah an ram hmingin tournament dang pawh a khel thei lo. A tan chuan rilru khingbai taka tournament hmachhawn a ngai ṭhin a, number 1 a nihna pawh a hum rei thei lo.

Inkhel dangah Stefanos Tsitsipas chuan Dennis Novak lakah 7-6 (2), 6-2 in hnehna a chang. Greek tlangval hi seeded pahnihna pek a ni a, a match lehpekah chuan Borna Coric a hmachhawn leh ang.

September thla khan Tsitsipas leh Coric te hi Cincinnati Masters final-ah an intawng a, inkhel hmuhnawm takah Coric a chak. Tsitsipas tan tun ṭum hi phuba lak theihna remchang a ni dawn.

First round inkhel dangah Jannik Sinner chuan Daniel Evans a hneh a, Cristian Garin chuan Karen Khachanov hnehin second round a paltlang ve bawk a ni.