January-ah player kan mamawh - Conte

Tottenham Hotspur boss Antonio Conte chuan tun season-ah a ṭha thei ang bera khel tur chuan January-a player lakluh an mamawh thu a sawi.

Conte chuan, "Club hian January-a player ṭha lakluh a pawimawhzia chu an hria ang. Chutiang thleng thlenga club thuneitute hnena sawifiah phet tum chi erawh ka ni lo," a ti a, player lakluh belh a duh.

Italian coach chuan, "World Cup hmaa a ṭha thei ang bera khelh kan duh. Tunah chuan January ka ngaihtuah rih lo a, mahse, World Cup khelh hmaa ṭha taka hun hman ka ngaihtuah phawt a ni," a ti a, World Cup khelh laia ngaihngam taka lo awm a duh a ni ber.

Spurs tan player inhliam, defender Cristian Romero (chawn) leh midfielder Pierre-Emile Hojbjerg (malpui) te chu Nilaini zana Champions League group stage match an khelh ṭumin an lo kir tawh a, hetihlai hian Dejan Kulusevski (malpui) leh Richarlison (chawn) chu hliam vangin an la chawl mek thung a ni.

London club hi an league match hnuhnung pahnihah Manchester United (2-0) leh Newcastle United (2-1) ngam loin an tlawm a, heti chung hian league-ah pathumna la ni mekin, hmahruaitu Arsenal chu match khata khel tam chungin, point ngain an phak lo mek.