Varane a chawl rei dawn

Manchester United defender Raphael Varane chu World Cup hmain a inkhel thei dawn tawh lo, a khelh mekna Man United ang bawkin an ram France chuan pawi an ti khawp ang.

Chelsea nen an inhnehtawk ṭumin Varane hi a ke a hliam, khelmual aṭanga a chhuah dawnah a mittui a tla hial. A hliam nat vang ni loin, inelna lian leh ngaihhlut World Cup khel lo thei dinhmuna a din avangin a rilru a hrehawm a ni.

Man United manager Erik ten Hag chuan, "Varane a la inkhel thei lo, World Cup thleng a chawlh a ngai ang, a hliam dinhmun hi endik chhunzawm zel a ni ang," tiin a sawi.

Qatar World Cup hi November 20 aṭanga khelh a ni dawn. France international hi a dam hman a nih pawhin club lamah a inkhel hman tawh dawn lo tihna a ni a, a ṭhat dan berin inelna a hmachhawn thei dawn lo.