MotoGP tawp niah Rossi inlan dawn

Valentino Rossi chuan tun season MotoGP intlansiak hnuhnung ber chu a hmuna en ngei a tum thu a sawi. Championship hmahruai mektu Francesco Bagnaia a ṭan dawn tih a sawi chiang bawk.

November 6, Pathianni zanah Valencian Grand Prix tlan a ni dawn, tun season chhunga intlansiak hnuhnung berah hian world champion pawh a chiang dawn chauh, hmahruai mektu Bagnaia tan chesual loa tlan tluan theih a pawimawh ang.

Yamaha rider ropui ni ṭhin, bike intlansiak chawlhsan ta Rossi chuan, "Tun hma pawhin boruak sang leh nuam tak tak ka lo tawng ve tawh ṭhin, an boruak awmdan tur chu ka hriatthiampui ve viau.

"Inelna a la zawh loh hi chuan tu tan mah inthlahdah a thiang lo, kei ngei pawhin a tawpa chesual nih a pawizia ka hre tawh, a hnuah inchhir viau mah ila awmzia a nei thei tawh chuang lo," tiin fimkhur taka tlan turin Bagnaia a chah.

Kum 2006 khan Rossi hian rider championship hmahruaitu ni chungin intlansiak hnuhnung ber a hmachhawn, mahse a chesual a, a tawpah Nicky Hayden a champion daih - thil thleng tawh hi rider dangte pawhin inzir nan hmang se a duh a ni.

Tun season kal laiah pawh a tir lamah Quartararo a kal fal, a chet fuh vanglai chuan point 91 zeta hmahruai lai pawh a nei. Mahse, tunah chuan a nomawi humhim turin vanneihna a mamawh tel tawh, chak ringawt a tawk lo - a chunga mi Bagnaia-a'n point a hmuh belh loh a ngai dawn.