West Brom boss thar Corberan

Championship club talbuai West Bromwich Albion chuan coach atan Carlos Corberan an lakluh thu an puang a, Huddersfield boss hlui hi kum hnih leh a chanve chhung atan contract hi an ziahpui a ni.

Kum 39 mi coach hian Leeds United-ah pawh assistant coach hna a lo chelh tawh a, July 2020 - July 2022 inkar kha Huddersfield a enkawl bawk - Spanish coach hi English football-ah a mikhual lo.

August 2022 khan Greece club ṭha Olympiakos enkawl mah se, ni 49 chiah a enkawl hman tihin a hna aṭanga chawlhtir a ni a, tunah West Brom-in a chhanchhuah theih beiseiin an lalut leh ta a ni.

Baggies chief executive Ron Gourlay chuan, "Mahni inringtawk tak, tha tho tak leh thil chik mi tak a ni a, he club-a hlawhtlinna thlen ka châk tluk zeta châk ve tho a ni," a ti.

West Brom hian tun season league match 16 aṭangin vawi hnih chiah hnehna an chang a, Championship team 24 zingah 23-na an ni mek - Premier League-te pawh lo khel fo tawh club hian League One lama tlak loh dan an ngaihtuah.

Baggies hian Inrinni tlai dar 5:00-ah coach thar an neih hnua an match hmasa ber chu an khel dawn a, Sheffield United an mikhual ang.