FIFA U17 Women's World Cup Final khel tur a hriat ta

India rama khelh mek FIFA Under-17 Women's World Cup semifinal chu khelh zawh a ni ta a, Colombia leh Spain ten an khingpui ve ve hnehin, final an lut.

Jawaharlal Nehru Stadium, Margao-a semifinal inkhel hmasa zawkah Nigeria leh Colombia ten goal an khung thei lo a, penalty hmanga chak zawk zawn a nih hnuah 6-5 in Colombia an chak - quarterfinal-a penalty hmanga chak Nigeria an vannei nawn tawh lo.

Semifinal match hnihnaah Spain-in 1-0 in Germany an hneh a, extra time khelh a ngai mai dawna a lan hnu, minute 90-naah Spain tan Lucía Corrales chuan inkhela goal awmchhun a khung a, final an lut.

Final hi October 30, Pathianni zan dar 8:00-ah khelh a ni dawn a, DY Patil Stadium, Navi Mumbai-ah an khel ang. Pathianni tlai dar 4:30-ah Nigeria leh Germany te chu pathumna nih inchuhin an inkhel hmasa dawn a ni.

FIFA U17 Women's World Cup hi Sports 18-ah live-in a en theih dawn a, online-a en duh tan Voot Select app-ah a en theih bawk ang.

October 26, Nilaini Zan
Semifinal
Nigeria 0 - 0 Colombia
*Penalty-ah 6-5 in Colombia an chak
Germany 0 - 1 Spain
SPA: Lucía Corrales 90'
October 30, Pathianni Zan
Pathumna Zawnna
Nigeria 4:30 PM Germany
Final
Colombia 8:00 PM Spain