Chelsea leh Spurs ten Man City an hnaih thei ang em?

Premier League-ah Manchester City chu champion nomawi humhim turin mi nawlpuiin an ring a, amaherawhchu point dinhmun thlir chuan Pep Guardiola hote hi midang chunga leng an ni bik lo.

Vawiin tlai dar 5:00 hian Man City-in Leicester City hmachhawn turin King Power Stadium an tlawh dawn. Zanin dar 7:30-ah Chelsea-in Graham Potter-a club hlui Brighton & Hove Albion chu Amex Stadium-ah an hmachhawn dawn a, hemi hunah tho hian Vitality Stadium-ah Tottenham Hotspur leh mualneitu Bournemouth te an inkhel ang.

Haaland tum châk Rodgers
Manchester City-in kar laihawlah Borussia Dortmund an hmachhawn a, goal awm loin an inhnehtawk. Inhliam vangin Erling Haaland chuan first half chauh a khel a, Leicester City hmachhawn thei lo dinhmunah a ding.

Norwegian striker Haaland hian City tan league match 11-ah goal 17 a khung tawh a, zanin hian inlan thei lo se Foxes tan chanchin lawmawm a ni ngei ang.

Mahse, Leicester manager Brendan Rodgers chuan, "A naupan lai aṭanga ka hriat a ni a, goal khung thei bik a ni. Kan mual ngeia player ṭha hmasawnna hmuh hi ka châk a, kan nauten player ṭha laka an theihna an fiah hi a pawimawh bawk. Inlan thei ngei se ka duh," tiin Haaland inlan se a duh thu a sawi.

Foxes hian season bul an ṭan ṭha lo a, match 11-ah point kua chauh an hmu. Amaherawhchu, Rodgers-a hote hian match hnuhnung pathumah chak loh an nei lo a, Leeds (2-0) leh Wolves (4-0) te an hneh avangin an inrintawk lai tak a ni ang.

Chutihrualin Man City erawh Haaland awm lo pawh ni se buaina tur a la awm lo a, Norwegian striker thlak turin Julian Alvarez a inpeih. City hian khelh zat inangah Arsenal point hnihin an pha lo a, FIFA World Cup ṭan hma ngeia league hmahruaitu nih an duh ang.

Brighton Vs Chelsea
Brighton leh Chelsea inkhel hi chu Premier League inkhel pakhat a ni ve mai ṭhin a, tun season-ah erawh a ni dawn lo. Blues-in Seagulls manager Graham Potter an chhuhsak a, London club hian Potter-a hoin Amex Stadium an tlawh dawn.

Potter-a'n a club hlui a hmachhawn tur hi en a châkawm hle. Seagulls hian Potter thlak nan Roberto De Zerbi an lalut a, manager thar hnuah chak la nei lo mah se passing football an khel a, Manchester City lakah pawh 52% ball possession an nei thei hial.

De Zerbi hian a naute a khelhtir dan aṭangin pa kal khat tak tih a hriat thei a, Man City an hmachhawn ṭum pawhin an goal bulah ball an in pass ngam a, Pep Guardiola hote pawhin point thum hlawhchhuah an harsat hle. Potter awm loh hnuah Brighton-in chawhrualin ball an chang tam sawt a, ball an in pass tam a, shot pawh an ngah - mahse a pawimawh ber goal khung an harsat.

Brighton hian insiamṭhatna lai tur an nei tih chu a chiang a, Chelsea lakah an insiamṭha a nih chuan Potter an chhuahtir hi pawi an ti lo khawp ang. Chutihrualin Potter hnuaiah Chelsea-in hma an sawn a, Thomas Tuchel enkawl lai aiin chawhrualin ball an chang tam a, pass an ngah a, shot an ngah a, goal an khung tam zawk.

Potter-a'n first keeper atan Kepa Arrizabalaga a ring ngam a, English defender Trevoh Chalobah pawhin hmun pawimawh a chang. Blues hian Potter hnuaiah chak loh an la nei lo a, khelh dan nghet tak an neih avangin Brighton lakah pawh chak tura rinkai zawk an ni.

Conte hote chet hun
Tottenham Hotspur-in season bul an ṭan ṭha a, champion hial sawi rik ni hman mah se Manchester United an hneh loh hnuah Newcastle United lakah an tlawm. Spurs tan nomawi sawi rem tawh lo a, chutihrualin season thara Champions League khelh an duh a nih chuan zanin hian Bournemouth an hneh ngei a ṭul.

Spurs manager Antonio Conte hian Juventus, Chelsea leh Inter Milan tan sulhnu ṭha tak a nei a, champion dan kawng pawh a hria. Italian manager Conte hian huai takin a lungawi lohna a lantir ṭhin a, tun season-ah pawh Premier League leh UCL-ah hnawhchhuah a ni ve ve tawh.

Conte thinurna hi khelmual chhungah a player-ten a ṭha zawnga an chhawm thei a nih chuan an hlauhawm sawt dawn. Bournemouth tan Spurs hmachhawn hi a châkawm dawn lo a; Harry Kane leh Son Heung-min ten dan an harsa dawn.

Erling Haaland chet ṭhat vangin Kane-a hming hi a ri tam tawk lo a, amaherawhchu England captain Kane hian match 12 aṭangin goal 10 a khung tawh. Season liam taa goal 23 khungtu Son erawhin league-ah goal thum chauh a la khung a, Kane leh Son te hi an che ṭha a nih chuan Cherries tan chelh rual an ni lo ang.