South Africa hmaah India leh Kohli fiahna

T20 World Cup-ah India an che ṭha a, Virat Kohli a che ropui hle. October 30, Pathianni tlai dar 4:30 hian Perth Stadium-ah India-in South Africa an hmachhawn dawn a, Rohit Sharma hote hian hnehna an chang a nih chuan semifinal an hnaih sawt ang.

Kohli Ropuia
India-in match hmasa berah Pakistan an hmachhawn a, chak beiseiawm tawh loh hnuah Virat Kohli rawn che ṭhain ball tawp berah hnehna an chang. Kohli hian ball 53 lekah 82 runs a siam a, a tawp thlengin a dam tluan bawk.

Men in Blue hian Netherlands an hmachhawn leh a, Kohli vawm hlum thei an awm chuang lo. India captain hlui Kohli hian ball 44-ah 62 runs a siam a, India-in awlsam taka hnehna an chan kawngah a ṭangkai. Tun ṭum T20 World Cup-ah Kohli vawm hlum thei an awm lo a, South Africa lakah pawh en bik a hlawh ang.

Netherlands lakah hian Suryakumar Yadav a rawn che ṭha bawk a, ball 25 lekah 51 runs siamin a dam tluan bawk. Suryakumar hi kum 32 a ni tawh a, nikum khan ram tan a khel ṭan chauh a, Test match-ah phei chuan a la inlan lo.

Amaherawhchu Suryakumar hi kumin chhunga T20 cricket-a run siam tam ber a ni a, batting ranking-ah pawh khawvel pumah pathumna ni pha a ni. Mumbai tlangval Suryakumar chet ṭhat zel hi a pawimawh a, chutihrualin opener KL Rahul hi a muthlu reng thiang lo - Proteas laka a che ṭha lo a nih chuan hahchawlhtir a ṭul tawh hial ang.

Inkhel pawimawh
Group khatah ram paruk an awm a, pahnih chiahin semifinal an lut dawn. South Africa hi an vanduai a, Zimbabwe nena an inkhelh ṭumin result a awm lo a, point hnih hmuh theih aṭangin point khat chiah an hmu. Proteas hian an theihna tak erawh an lantir leh tho a, Bangladesh chu 104 runs-in an sawp.

September thla tawp lam khan South Africa hian India an rawn tlawh a, T20 match thum khelin Men in Blue hi vawi hnih an chak. Amaherawhchu an inkhel hnuhnung pahnihah hian South Africa hian 220 runs an siam tling ve ve a, Bangladesh lakah 205 runs an siam bawk avangin tun ṭumah pawh hian run tam tura ngaih a ni.

South Africa tan Quinton de Kock a rintlak ṭhin a, Bangladesh laka century siamtu Rilee Rossouw pawhin inrintawkna a ngah ang. Proteas-in chak ngei an tum dawn a, batter ṭha tak tak an neih avangin India bowler-te tan hna a hautak khawp ang.

Inkhel dang
Pakistan-in India an hneh loh hnuah team tenau Zimbabwe an hneh lo a, vawiin chhun dar 12:30 hian Netherlands an hmachhawn dawn. Shaheens captain Babar Azam-a'n beisei a la pha lo chhunzawm zel a, Netherlands lakah chak ringawt a tawk lo - chiang taka chak a ṭul dawn.

Vawiin chawhma dar 8:30-ah Bangladesh leh Zimbabwe te an inkhel dawn bawk. Zimbabwe hian hneh loh an la tawng lo a, Bangladesh an hneh a nih chuan semifinal beiseina an chhawm nung zel thei ang. Bangladesh pawh South Africa lakah mualpho mah se Netherlands an hneh tawh a, Zimbabwe an hneh theih chuan semifinal kawng a la inhawng ang.