Kolkata derby - a hun a thleng leh ta
Indian football chanchin sawi a nih apiangin Kolkata derby boruak 'hot' zia sawi a ni ṭhin a, zanin dar 7:30-ah ATK Mohun Bagan leh East Bengal-ten ropui zawk nih an inchuh dawn.
East Bengal-in Mizo player Jerry Lalrinzuala leh Lalchungnunga an nei a, Mohun Bagan-in Lalrinliana Hnamte an nei thung - Vanglainiin Mizo player-te a biaknaah, Kolkata derby khel tura an inpeih tawh thu an sawi.
Season hmasaa East Bengal tana a hming chhertu, tun season-a Bagan pantu Lalrinliana Hnamte (Terina) chuan, "Inpuahchahna kan nei ṭha thawkhat viau. Player-te chauh ni loin, coaching staff-te pawh match dang aiin an ṭang zual a, ka club hlui kan hmachhawn dawn avangin ka châk lehzual a ni," a ti.
East Bengal-a Mizo player pahnih Jerry Lalrinzuala leh Lalchungnunga ten Kolkata club-ah hmun pawimawh an chang a, zaninah pawh inlan leh ngei tura beisei an ni - match thum an khelh tawhah an la inlan vek.
Chennaiyin defender hlui Jerry-a'n khawsik vangin harsatna a tawk a, Ningani khan club training a zawm ve leh chauh. Mahse, coach Stephen Constantine-a'n Jerry chungah rinna a nghat a, India tana a match hmasa ber khelhtirtu coach hian Jerry tel loa Kolkata derby hmachhawn a zuam lo.
Jerry chuan, "100% ka la ni lo a, mahse, Coach-in khel tura min duh tlat avangin ka inlan ka ring," a ti a, "Kan chak ngei ngei a ngai," tiin zanin Bagan nena an inkhel tur pawimawhzia a sawi bawk.
East Bengal hian an match hmasa pahnihah Kerala Blasters (3-1) leh FC Goa (2-1) an ngam lo a, mahse, an match hnuhnung berah NorthEast United (3-1) an hneh avangin an phur vanglai tak a ni.
Sum hmang nasa Bagan hian match hnih chiah an la khel a, match hmasa zawkah 2-1 in Chennaiyin ngam lo mah se Kerala Blasters (5-2) an hneh zui a, goal khung an thiam tih an pholang - Jerry leh Chungnunga te tan ṭan mar a ngai khawp ang!
Tun season Durand Cup-ah team pahnih hi an lo intawng tawh a, 1-0 in Bagan an chak. Mahse, ISL boruak nen khaikhin chi a ni lo a, an ṭhat dan bera team pahnih an intawn loh avangin zanin inkhel tur teh lawk nan a tling lo.
Kartawp ISL inkhel tur dangah, vawiin tlai dar 5:30 hian Hyderabad leh FC Goa an intawng dawn a, Pathianni zan dar 7:30-ah match thum khelh tawha chak la nei lo NorthEast United chuan Jamshedpur an lenchilh dawn bawk.