FA-in Klopp pawisa an chawitir

English football-a thuneitu sang ber Football Association chuan Liverpool boss Jurgen Klopp chu Manchester City nen an inkhelh ṭuma a chet dan mawi lo avangin an hrem a, £30,000 (Rs. 28,51,872) chawi turin an ti.

Liverpool hian October 16 zan khan City hi mikhualin, 1-0 in hnehna an chang a, Anfield-a inkhel boruak sang takah Mohamed Salah laka foul chu ham turah Klopp hian a ngai a, mawi lo takin mual sirah assistant referee chu a lo an khum.

Referee chuan Klopp hi red card a pe zui a, inkhelh zawhah German coach hian hnawhchhuah a phu thu sawi zuiin, "Thil kha a rawn thleng thut a ni ber a, ka chet dan kha ka chhuang lo - red card hmuh ka phu a ni," a ti.

Kum 55 mi Klopp hi FA rule E3 dan bawhchhiaah puh a ni a, he danah hian ṭawngkam mawi lo, football hmai tibal thei thil hman phal lohna dan a inziak a, Klopp hi hrem a ni ta a ni.

FA chuan Klopp hian a chet dan mawi lo tak chu a pawm thu an sawi a, independent Regulatory Commission chuan a thubuai hi ngaihtuahin hremna hi an pe a ni - Liverpool hian an duh chuan an khinglet thei ang.

Season bul ṭan ṭha lo tak Liverpool hian City an ngam loh hnuah khan league match hnih khel leh tawhin, West Ham chu 1-0 in ngam mah se, an hneh ngei tura ngaih Nottingham Forest chu 1-0 in an ngam lo thung.

Mahse, Reds hi Champions League lamah insiamṭha zuiin, Ajax chu 3-0 in an hneh a, last 16 an inpetkai - zanin dar 12:15-ah league match khel turin Leeds United an mikhual zui ang.