November-ah MPL Qualifier khel dawn

Mizoram Football Association Executive Committee chuan season thara Mizoram Premier League khel tur zawnna, MPL Qualifier khelh hun atan November 26, 2022 a ruat a, Aizawlah inelna hi neih tur a ni ang.

MPL Under-18 chu February 7, 2023-ah khelh tura tih a ni bawk - Ningania MFA Office-a Mizoram football thuneitu sang ṭhukhawm hian MPL chungchang bakah thil pawimawh tak tak an rel a, AIFF calendar mil zela kal dan tur ngaihtuahin ruahmanna an siam a ni.

December 6-ah MPL final
MFA thurel langsar zingah MPL9 final khelh hun sawn hnaih chu a tel a, December 6-ah final khel turin ruahmanna siam a ni - he ruahmanna siam a nih chhan hi Mizoram team-in Santosh Trophy atana inbuatsaihna ṭha zawk an neih theih nana tih a ni.

Santosh Trophy & Senior Women's
India rama football thuneitu sang ber AIFF chuan Santosh Trophy hi Senior National Women's Football Championship nen a kalpui dan tur a thlak danglam a, zonal round-a khelh awm tawh loin group hrang hrangah a ṭhen a ni. Group inelna hi December 9-31 chhunga khelh tura ruahman a nih avangin MPL9 final khelh hun pawh sawn hnaih a ni a, MFA chuan Mizoram mipa leh hmeichhe team enkawltu tur pawh a ruat fel nghal.

Hmeichhe football
Inter District Women's Football Championship chu November 15-ah ṭan tur a ni a, Siaha District Football Association chuan inelna hi a thleng dawn a, he inelna hi National Senior Women's Championship lo awm tura player tur zawnna hun atan hman a ni nghal dawn a ni.

Kolasib-ah Junior Boys
MFA Inter District Junior Boys Football Championship chu Kolasib DFA-in a thleng dawn a, January 17, 2023-ah inelna hi neih ṭan tur niin, January 1, 2007 leh December 31, 2009 inkara piangte intihsiakna tur a ni.

NE Olympic Games
North East Olympic Games chu November thla khian Shillong, Meghalaya-ah neih tur a ni a, Mizoram Olympic Association-te ruahman angin MFA chuan mipa (under 21) leh hmeichhe (under 17) team a tir dâwn a, Aizawlah training kalpui mêk a ni.

MFA = 50
Kum 2023-ah MFA chuan kum 50 a tling dawn a, he Golden Jubilee lawmna pakhat atan 'inkhelhpui' buatsaih tum a ni. MFA thuchhuaha tarlan a nih danin, he hun atan hian MFA chuan ram pawn lamte nen indawrna a kalpui mek a, a hlawhtlin theih chuan chiang zawka puanzar thuai a nih tur thu an sawi.