Man United tan Ronaldo-a'n goal a khung

29th October, 2022

Hrem a nih hnuah Cristiano Ronaldo chu Manchester United tan a inkhel ve leh ta a, goal a khung nghal. Ronaldo bakah substitute Marcus Rashford leh Diogo Dalot te goal hmangin Sheriff Tiraspol 3-0 in an hneh.

Tottenham an hneh ṭumin Ronaldo-a'n khelmual a chhuahsan a, hei vang hian hrem a ni. Chelsea lakah Erik ten Hag-a'n a chhawr lo a, tunah erawh inkhel bul ṭantu zingah a tel a, hun tawp dawnah angle zim angreng tak aṭangin goal a khung.

Portuguese forward hian a goal khung thiam a la theihnghilh lo a, khelhna hmun pek a nih chuan goal a la khung belh zel dawn ni pawhin a lang, a kum a tam deuh tawh avangin match zawng zawng khelh erawh a harsa tawh dawn.

Man United manager Ten Hag chuan, "Hma lam panin a kal zel a, club lam pawhin kawng dikah kan kalpui. Ani hi chu a beidawng ve ngai lo a, hei vang hian a football zinkawng pawh a hlawhtling hle," tiin Ronaldo chungchang a sawi.

Ten Hag-a naute hi chak mah se group E-ah pahnihna an la ni mek, an match hmasa lama Real Sociedad an ngam lo kha an la tuar. Kar leh hian group match hnuhnung ber khel turin Spanish club hi an tlawh dawn, hnehna chan theih a pawimawh ang.

Man United hian Pathianni zan dar 9:45-ah Premier League khel turin West Ham United an mikhual dawn. David Moyes-a naute hi team nghet pangngai tak an ni a, inkhel hautak an hmachhawn zui ngei ang.

Ningani zan khan Hammers hian Europa Conference League an khel ve thung, midfielder Manuel Lanzini goal khat hmangin Silkeborg 1-0 in an hneh a, an awmna group hmahruaitu an ni chiang hle - match nga an khelh tawhah an chak vek.

Europa League
October 27, Ningani
Zurich 2 - 1 Bodo/Glimt
PSV 2 - 0 Arsenal
Lazio 2 - 1 Midtjylland
AEK Larnaca 3 - 3 Dinamo Kiev
Fenerbahce 3 - 3 Rennes
Ludogorets 0 - 1 Real Betis
Malmo 0 - 2 Union Saint-Gilloise
Union Berlin 1 - 0 Sporting Braga
Manchester United 3 - 0 Sheriff
Omonia Nicosia 0 - 2 Real Sociedad
HJK 0 - 0 AS Roma
Sturm Graz 1 - 0 Feyenoord
Freiburg 1 - 1 Olympiakos
Nantes 2 - 1 Qarabag
Red Star Belgrade 2 - 1 Trabzonspor
Ferencvaros 1 - 1 AS Monaco